Аб магчымых зменах у парадку электронных зваротаў грамадзян распавёў намеснік кіраўніка пастаяннай камісіі палаты прадстаўнікоў па правах чалавека, нацыянальных адносінах і СМІ Аксана Няхайчык, перадае БелТА.
Змены не прадугледжваюць скасаванне магчымасці электроннага звароту, а толькі ўпарадкоўваюць яго разгляд, сцвярджае чыноўнік.
Сёння электронны зварот можна адаслаць па электроннай пошце, а таксама праз рубрыку на сайце ўстановы. У першым выпадку можна не пазначыць свой сапраўдны адрас ці іншыя звесткі, у форме на сайце запаўненне неабходных палёў абавязковае для адпраўкі звароту.
Да таго ж, на сайце ахвочы напісаць зварот можа азнаёміцца з інфармацыяй пра дзейнасць дзяржоргана і вырашыць, ці кампетэнтны орган альбо чыноўнік у вырашэнні яго пытання.
Аўтары законапраекту не прапануюць забараняць пісаць чыноўнікам электронныя лісты.
Разгляд электронных зваротаў, адасланых не праз адмысловую форму, прапануюць зрабіць неабавязковым.
Законапраект ужо прыняты ў першым чытанні, да другога чытання паступіла больш за 40 прапаноў, траціна з іх — ад грамадзян.
