Цягам года музыка і мастак Лявон Вольскі на сайце кампаніі «Будзьма беларусамі!» віншаваў нас з каляндарнымі і прафесійнымі святамі, многія з якіх дасталіся нам у спадчыну яшчэ з савецкіх часоў. І рабіў ён гэта незвычайна, пераасэнсоўваючы кожнае свята з уласцівым яму пачуццём гумару. Нарэшце 28 паштовак да 28 святаў сабраныя пад адной вокладкай, і кампанія «Будзьма!» радая прадставіць друкаваны набор «Святы, якія заўжды з табой» для тых, хто глядзіць на жыццё з гумарам. Наборы чакаюць сваіх пакупнікоў на палічках сталічных кнігарняў і інтэрнэт-крамаў!
«Пачынаў я з савецкіх святаў — 23 лютага і 8 сакавіка, — кажа Лявон Вольскі, — А далей пацягнуўся ланцуг — міліцыянты, дэсантнікі, будаўнікі, мытнікі, работнікі гандлю…»
Паштоўкі атрымаліся вясёлыя і сатырычныя — кансерватыўную бабулю з Днём медыцынскага работніка ёй не павіншуеш. Але аўтар упэўнены: з дапамогай набору можна нават сэрца дзяўчыны заваяваць:
«Паштоўкі можна дарыць па прафесійнай прыкмеце — вынаходніка і рацыяналізатара ўшанаваць у ягоны дзень вясёлай карцінкай і пранікнёнымі словамі. А можна і парушаць гэты прынцып! Вось падабаецца табе дзяўчына, і ты хочаш прыцягнуць яе ўвагу. Тады можна метадычна дасылаць ці проста тэт-а-тэт дарыць ёй паштоўкі: «Віншую цябе з днём работніка сельскай гаспадаркі!» — напрыклад. Я думаю, яна ацэніць гэты крэатыўны падыход».
Набыць набор паштовак «Святы, якія заўжды з табой» і ўжо сёння павіншаваць сяброў з Днём абаронцаў Айчыны можна ў сталічных крамах:
«Акадэмкніга» (пр-т Незалежнасці, 72); кнігарня «логвінаЎ» (пр-т Незалежнасці, 37А); «Кніжны салон» (вул. Калініна, 5); «Кнігарня пісьменніка» (вул. Казлова, 2); «Веды» (вул. К. Маркса, 36); «Светач» (пр-т Пераможцаў, 11); «Цэнтральны кніжны» (пр-т Незалежнасці, 19); «Кнігі & кніжачкі» (пр-т Незалежнасці, 14); Кніжная выстава-кірмаш «Мир книг» (вул. Янкі Купалы, 27); «Эўрыка» (вул. Куйбышава, 75).
А таксама ў інтэрнэт-крамах knihi.by і prastora.by.
«Чакаць не трэба свята — яно заўжды з табой!»:)
