18 сакавіка ў інфармацыйна-выставачнай зале Цэнтральнай навуковай бібліятэкі НАН Беларусі (Сурганава, 15) пройдзе прэзентацыя кнігі Міколы Волкава «Артылерыя Нясвіжскага замка».
Артылерыя старажытнага Нясвіжа – унікальная з’ява гісторыі ўзбраення і ліцейнага мастацтва не толькі Беларусі, але і ўсёй Еўропы. Гарматы, выкананыя ў канцы XVI – пачатку XVII ст. па замове магната Мікалая Крыштафа Радзівіла Сіроткі, былі не толькі дасканалай зброяй свайго часу, але на доўгія стагоддзі сталі ўзорам выбітнага дэкаратыўнага аздаблення.
Беларускі гісторык Мікола Волкаў удала спалучыў у сваёй кнізе аналіз тэхнічных і баявых характарыстык нясвіжскай артылерыі з расповедам пра прымяненне гармат у абароне радзівілаўскай фартэцыі і іх значэнне для магутнага магнацкага роду
Новая гістарычная кніга будзе цікавая не толькі спецыялістам-зброязнаўцам, але і ўсім, хто цікавіцца гісторыяй дэкаратыўнага мастацтва.
Выданне багата ілюстраванае ўнікальнымі гравюрамі, старажытнымі замалёўкамі і сучаснымі фатаграфіямі, большасць з якіх друкуецца ўпершыню.
На прэзентацыі вы даведаецеся, хто такі Мольцфельт, чаму радзівілаўскія гарматы маюць такія дзіўныя назвы – «Хімера», «Папугай», «Саламандра», чым адрозніваецца бамбарда ад фальканэта і шмат іншага. Мікола Волкаў распавядзе таксама, як склаўся пакручасты лёс знакамітых радзівілаўскіх гармат у XIX–XX стагоддзях.
Пачатак прэзентацыі – 18 сакавіка а 15-ай гадзіне. Адрас ЦНБ імя Я.Коласа: г. Мінск, вул. Сурганава 15.
Мікола Волкаў – гісторык маладой генерацыі. Выпускнік гістарычнага факультэта БДУ. Паспяхова скончыў магістарскія праграмы «Ахова і інтэрпрэтацыя гісторыка-культурнай спадчыны» ў Еўрапейскім гуманітарным універсітэце і «Мастацтвазнаўства» ў Інстытуце падрыхтоўкі навуковых кадраў НАН Беларусі. Працуе ў Інстытуце гісторыі НАН Беларусі, дзе рыхтуе кандыдацкую дысертацыю.
Асноўная сфера навуковых інтарэсаў – гісторыя фартыфікацый, артылерыі, ваеннай справы, архітэктуры і горадабудаўніцтва Вялікага Княства Літоўскага ў перыяд ранняга Новага часу. Аўтар шматлікіх публікацый у навуковых выданнях Беларусі, Польшчы, Расіі і Украіны.
З асобнымі раздзеламі і зместам выдання можна азнаёміцца тут.
Набыць кнігу можна ў менскіх кнігарнях «Акадэмкніга», «Логвінаў», «Кніжны салон», кніжных кірмашах на Янкі Купалы і ў КЗ «Мінск, а таксама ў беларускіх інтэрнэт-крамах.
