Расійскі прэзідэнт Уладзімір Пуцін, выступаючы на канцэрце-мітынгу, прысвечаным далучэнню Крыму да Расіі, заявіў, што рускія і ўкраінцы — гэта адзін народ.
Паводле яго слоў, так заўсёды лічылі ў Расіі, і ён сам да гэтага часу так думае. У сваёй кароткай прамове Пуцін паабяцаў, што Расія будзе рабіць усё, каб «аднавіць нармальныя міждзяржаўныя адносіны» з Украінай.
Раней у сераду Пуцін правёў нараду па праблемах развіцця Крыма. Ён падзякаваў насельніцтву паўвострава «за вытрымку, за мужнасць, якія яны праявілі год таму», і заявіў, што санкцыі ў дачыненні да Расіі — не фатальныя, хоць і наносяць шкоду працы.
«Мы будзем пераадольваць цяжкасці, якія мы з вамі так лёгка ствараем самі для сябе на працягу ўсяго апошняга часу», — заявіў Пуцін пазней, выступаючы са сцэны.
Ён таксама распавёў пра матывы, якія заахвоцілі яго пачаць актыўныя дзеянні ў Крыме ў мінулым годзе.
«Мы зразумелі, што ў дачыненні да Крыма гаворка ідзе не проста пра тэрыторыю, хай і стратэгічна важную, гаворка ідзе пра мільёны рускіх людзей, мільёны нашых суайчыннікаў, якія маюць патрэбу ў нашай дапамозе і падтрымцы. Мы зразумелі, наколькі ўсё гэта важна для нас. Мы зразумелі, што гаворка ідзе не проста пра тэрыторыю, якой у нас дастаткова, гаворка ідзе пра гістарычныя вытокі, пра крыніцы нашай духоўнасці і дзяржаўнасці. Гаворка ідзе пра тое, што робіць нас адзіным народам, адзінай згуртаванай нацыяй», — адзначыў прэзідэнт Расіі.
Пуцін праспяваў гімн і заявіў прысутным на мітынгу ў цэнтры Масквы, што краіна імі ганарыцца.
Па сцвярджэнні праваахоўных органаў Масквы, на мітынг у цэнтры расійскай сталіцы прыйшлі 110 тысяч чалавек. Незалежнага пацверджання гэтай лічбы няма.
