Eudicella gralli. Фота: Arpingstone via Wikimedia
Жукі ёсць не толькі самай вялікай групай жывёл, але і самай жывучай, вызначыла даследаванне, апублікаванне ў часопісе Proceedings of the Royal Society B.
За ўсю амаль 300-мільённую гісторыю жукоў вымерла толькі 34 сямействы з 214. А падатрад рознаедных, што ўключае 90% вядомых відаў жукоў, наогул пазбег выміранняў.
Палеантолагі з універсітэта штата Каларада даследавалі 5,5 тысяч рэштак жукоў з выкапняў па ўсім свеце, самыя раннія з якіх датуюцца пермскім перыядам (прыкладна 284 млн год таму). Усе сямействы рознаедных жукоў, вядомыя чалавецтву з таго часу, перажылі і пермска-трыясавае, і мел-палеагенавае, і больш дробныя выміранні.
Навукоўцы кажуць, што жывучасць жукоў абумоўленая хуткай адаптацыяй да змены клімату і разнастайнасцю рацыёну.