Рэспубліканскі інстытут кантролю ведаў (РІКВ) працягвае патрабаваць спагнаць з мінскага рэпетытара Аляксандра Васілеўскага штраф за парушэнне аўтарскіх правоў — публікацыю ў інтэрнэце рашэння задач рэпетыцыйнага тэставання.
Васілеўскі некалькі гадоў аказвае паслугі рэпетытара па фізіцы і матэматыцы. Апрача асноўнай падрыхтоўкі сваіх вучняў ён таксама выкладвае ў інтэрнэт рашэнні задач, рэкамендацыі, як правільна праходзіць тэставанне.
РІКВ, які праводзіць тэставанне, не задавальняе, што ў інтэрнэце з'яўляюцца прыклады задач з тэста і іх рашэнне.
Прадстаўнікі інстытута патрабуюць аштрафаваць мінскага рэпетытара на падставе арт. 9.21 КоАП (незаконнае распаўсюджванне або іншае незаконнае выкарыстанне аб'ектаў аўтарскага права).
«Ён робіць гэта з карыслівай мэты — у якасці рэкламы, каб прыцягнуць новых кліентаў», — сцвярджаў прадстаўнік істца 4 сакавіка на слуханнях у судзе Фрунзенскага раёна Мінска.
Васілеўскі свае дзеянні тлумачыць тым, што хоча дапамагчы абітурыентам лепш падрыхтавацца да тэставання, і грошай за гэта не бярэ.
Апрача таго, рэпетытар настойвае, што рашэнне задачы не з'яўляецца вытворным творам, як мяркуе РІКВ. «Рашыць задачу можа любы настаўнік, тут няма ўнікальных метадаў і творчага падыходу», — заявіў адказчык на першым судовым пасяджэнні.
Тады суд у асобе суддзі Мікалая Ліпневіча заняў пазіцыю Васілеўскага, не ўгледзеўшы ў яго дзеяннях парушэння закону, а прадстаўнікі РІКВ заявілі, што будуць падаваць касацыйную скаргу.
Пра тое, што РІКВ апратэставаў рашэнне суда, Васілеўскі паведаміў 24 сакавіка на сваёй старонцы ў «Фэйсбуку».