Дзень Волі ў Нью-Ёрку, 2009. Фота: Антон Старкоў, zbsb.org
97-я ўгодкі абвяшчэння Беларускай Народнай Рэспублікі святкуюць 25 сакавіка не толькі ў Беларусі, але і за мяжой, паведамляе БелаПАН са спасылкай на Раду БНР.
Польшча
У Беларускім доме ў Варшаве пройдзе цырымонія ўручэння «Нацыянальнай прэміі Хартыі'97» у сферы абароны правоў чалавека імя Віктара Івашкевіча за 2014 год. Яе лаўрэатамі сталі былыя палітвязні Васіль Парфянкоў і Эдуард Лобаў, заслужаны майстар спорту Беларусі Віталь Гуркоў і рэжысёр Антон Цялежнікаў. Пасля ўручэння прэміі адбудзецца творчая сустрэча з мастаком і грамадскім дзеячам Аляксеем Марачкіным.
У Беластоку ў кафэ Zmiana Klimatu у 18:00 пачнецца канцэрт дзіцячага гурту «Баламуткі» і Vinsent, якія выступяць з беларускімі песнямі.
Акрамя таго, Дзень Волі ўжо адзначылі ў Варшаве шэсцем 22 сакавіка.
Літва
У Вільнюсе апоўдні на могілках Расу адбудзецца ўскладанне кветак на магілы падпісантаў Акта незалежнасці БНР. У сейме Літвы з 14:00 да 16:00 адбудзецца дыскусія «2015 год у Беларусі — калі геапалітыка бярэ верх над каштоўнасцямі дэмакратыі» з удзелам беларускіх і літоўскіх палітыкаў, праваабаронцаў, грамадскіх дзеячаў і сваякоў палітвязняў. У 18:00 ва Uzupio kavine пройдзе святочны канцэрт Лявона Вольскага і Паўла Аракеляна.
Украіна
У Кіеве святочныя мерапрыемствы пачнуцца ў 15:00 перад помнікам Уладзіміру Караткевічу каля пасольства Беларусі, а ў Чарнігаве Дзень Волі адзначаць вечарам у бары «Фальварак».
Расія
Маскоўскае таварыства беларускай культуры імя Ф.Скарыны заклікае ўсіх ахвотных у 18:30 прынесці кветкі да помніка Янку Купалу на Кутузаўскім праспекце. Пасля ўскладання кветак адбудзецца вячэра для ўсіх, хто пажадае.
Іншыя краіны Еўропы
У Бруселі на плошчы Шумана з 11:00 да 13:00 пройдзе пікет, арганізаваны Беларуска-еўрапейскім аб'яднаннем.
У Празе ў 12:00 адбудзецца традыцыйнае ўскладанне кветак на магілы кіраўнікоў БНР на Альшанскіх могілках, а вечарам у клубе Music City Club выступіць беларускі бард Зміцер Вайцюшкевіч.
У Беларускім доме ў Лондане ў 14:00 пачнецца выступленне прафесара Лундскага ўніверсітэта доктара гістарычных навук Пера Андэрса Рудлінга на тэму «Савецкая беларусізацыя: міф ці рэальнасць?».
***
У Мінску шэсце і мітынг з нагоды Дня Волі пройдуць з 15:00 да 18:00. Вулічныя святкаванні ў іншых гарадах, у тым ліку ў Віцебску, Гродне, Бярозе, Лідзе, забароненыя. Канцэрт на Дзень Волі ў Мінску адменены.
