У сяле Харбатава Іркуцкай вобласці РФ з бібліятэкі прыбралі некалькі вядомых дзіцячых кніг на аснове закона аб абароне дзяцей ад інфармацыі, што наносіць шкоду іх здароўю і развіццю.
Спіс казак, якія ў сяле цалкам забаранілі для распаўсюджвання сярод дзяцей усіх узростаў, саветнік прэзідэнта Уладзімір Талстой агучыў у Дзярждуме на круглым стале на тэму ролі літаратуры ў патрыятычным выхаванні.
У дакуменце, створаным у раённым аддзеле народнай адукацыі Іркуцкай вобласці, гаворыцца, што «Карлсан, які жыве на даху» адмаўляе сямейныя каштоўнасці і фармуе непавагу да бацькоў. Кніга «Прыгоды Тома Соера і Гекльберы Фіна», на думку органаў адукацыі, можа заахвоціць дзяцей займацца бадзяжніцтвам.
Прэтэнзіі ў мясцовых чыноўнікаў таксама выклікалі казкі для самых маленькіх. Напрыклад, у казцы «Іван Царэвіч і Шэры воўк» прысутнічаюць сцэны крадзяжу — там выкралі каня і Алену Прыгожую. У «Калабку» знайшлі сцэны фізічнага гвалту, а ў «Дзюймовачцы» — факты прымусу да ўступлення ў шлюб.
Пазначыўшы прэтэнзіі раённага аддзела народнай адукацыі да гэтых кніг, Талстой адзначыў, што дзецям забараняюць чытаць казкі, на якіх выраслі іх бацькі, бабулі і дзядулі. Прэзідэнт Расійскага кніжнага саюза Сяргей Сцяпашын ў сувязі з гэтым прапанаваў заканадаўцам больш уважліва ставіцца да сваёй дзейнасці і думаць пры прыняцці законаў.
Каментары