Рафаэла, Рашэль і Тагіян Біні, 29-гадовыя сёстры-трайняшкі з Пасу-Фунду (Бразілія) справілі супольнае вяселле, распавядае The Daily Mail. Відэа з вяселля мае Globo.com.
Падобныя тварамі дзяўчыны апранулі падобныя сукенкі ды зрабілі аднолькавыя прычоскі. Госці адзначалі нават падабенства іх жаніхоў — Рафаэля, Габрыэля і Эдуарда.
Жаніхі баяліся пераблытаць нявест. Але для іх была падказка — дзяўчыны насілі пры сабе букеты розных колераў. Ды жаніхі ўсё адно скардзіліся, што дзяўчыны іх «наўмысна блыталі». Дзяўчыны сцвярджаюць, што апрануліся аднолькава толькі таму, што ім «проста спадабаўся адзін і той жа стыль».
Ідэю адначасовага вяселля падказалі бацькі дзяўчын, Педра і Салеці. Праўда, бацька сумняваўся, ці здолее давесці адначасова трох дзяўчын да алтара.
