Палярнае ззянне. Фота: onebigphoto.com
Палярныя ззянні для жыхароў Зямлі можна ствараць штучна, пішуць навукоўцы ў часопісе Journal of Geophysical Research.
З дапамогай кампактнага паскаральніка элементарных часцінак Compass, распрацаванага ў амерыканскай Нацыянальнай лабараторыі паскаральнікаў, можна праводзіць даследаванні часцінак у верхніх пластах атмасферы.
Пабочны эфект даследаванняў з паскаральнікам Compass — самыя сапраўдныя палярныя ззянні.
Compass у тры разы больш магутны за ўжо запушчаныя на арбіту паскаральнікі часцінак. Энергія праменя, які апарат скіруе на Зямлю з вышыні 300 км, можа дасягаць 10 электронвольт за імпульс у 0,1 мікрасекунды.
Такія магутнасці патрэбныя для даследавання магнітнага поля Зямлі і вывучэння геамагнітных бураў, а таксама даследаванняў элементарных часцінак.
Пабочны эфект ад яго стрэлаў у тым, што «разагнаныя» малекулы створаць у атмасферы палярнае ззянне. Натуральныя палярныя ззянні ўтвараюцца падобным чынам, але ад часцінак сонечнага ветру, што ўзаемадзейнічаюць з верхнімі пластамі атмасферы.
Тэарэтычна, прамяні Compass могуць нават утварыць экзатычныя віды маланак.
Пакуль Compass ёсць толькі праектам, але навукоўцы кажуць аб магчымасці і мэтазгоднасці яго стварэння. Аб магчымасці стварэння палярных ззянняў «па замове» ў артыкуле не пішуць.