Фота з твітара Элана Маска
«Здаецца, Falcon прызямлілася нармальна, але праз залішнюю бакавую хуткасць завалілася на бок падчас прызямлення», — напісаў у Twitter заснавальнік SpaceX Элан Маск пра спробу захаваць цэлай ступень ракеты Falcon 9 пасля паспяховага запуску касмічнага грузавіка Dragon.
Гэта ўжо трэцяя амаль паспяховая спроба захаваць важную частку ракеты Falcon 9 пасля яе выкарыстання.
Маск жартуе, што кінецца ў жарало вулкана, калі пасадка нарэшце пройдзе паспяхова: «Час ужо».
Пакуль SpaceX мае нізкаякаснае відэа пасадкі, але ў хуткім часе атрымае з марской платформы высокаякасныя запісы, якія таксама дапамогуць выявіць прычыны «надта жорсткай» пасадкі.
Наступны запуск Falcon 9 прызначаны на 24 красавіка.
Папярэднія спробы пасадкі ступені Falcon 9 на марскую платформу адбыліся ў лютым і студзені. Калі ў SpaceX атрымаецца наладзіць стабільна паспяховыя пасадкі шматразовых ракет, касмічныя палёты могуць заўважна ўпасці ў цане.