euroradio.fm
22 красавіка ў Страсбургу прэзідэнт Парламенцкай асамблеі Рады Еўропы Ганна Брасэр выказалася пра сітуацыю ў Беларусі.
Яна нагадала ўмовы аднаўлення кантактаў з афіцыйным Мінскам: увядзенне мараторыя на смяротнае пакаранне, вызваленне палітвязняў і правядзенне свабодных выбараў. Да выканання трох гэтых умоваў казаць ні пра аднаўленне кантактаў на вышэйшым узроўні паміж ПАРЕ і афіцыйным Мінскам, ні пра вяртанне нашай краіне статусу спецзапрошанага казаць не даводзіцца.
«Я прызнаю важнасць ролі Беларусі ў арганізацыі ў Мінску перамоваў па ўрэгуляванні канфлікту ва Украіне — яны былі скіраваныя на тое, каб знайсці шляхі ўрэгулявання на ўсходзе Украіны. Хоць Мінскае пагадненне і даволі крохкае, спыненне агню пакуль неўстойлівае. Але тое, што Беларусь дала бакам пляцоўку для перамоў — пазітыўны крок.
Але тым не менш, мы не можам забывацца на тыя перашкоды, якія не дазваляюць Беларусі ўвайсці ў Раду Еўропы: пытанне смяротнага пакарання, свабодных выбараў і вызваленне палітвязняў.
Мы проста не можам сказаць: Вось, вы шмат зрабілі для перамоваў па Украіне і мы адкідаем у бок тыя значныя пытанні, якія мы ўздымалі. Але калі па гэтых пытаннях будзе прагрэс, то цалкам магчыма, што рашэнне аб недапушчэнні кантактаў на вышэйшым узроўні будзе адменена», — заявіла Ганна Брасэр.
Па яе словах, першым сведчаннем такога прагрэсу могуць стаць будучыя прэзідэнцкія выбары. Калі ад самага пачатку яны будуць праходзіць ва ўмовах роўных магчымасцяў для ўсіх кандыдатаў і свабоды, то гэта стане сігналам для ПАРЕ, што Беларусь сапраўды хоча развіцця дыялогу, кажа прэзідэнт ПАРЕ.
Нагадаем, рашэнне аб спыненні кантактаў на найвышэйшым узроўні паміж ПАРЕ і Беларуссю было прынятае ў красавіку 2010 года.
