23 красавіка (чацвер) анлайн-часопіс «Ідэя» арганізуе першае ў Беларусі публічнае мерапрыемства з удзелам Міжнароднага валютнага фонду. Спікер – старшы пастаянны прадстаўнік МВФ па Цэнтральнай і Усходняй Еўропе Джэймс Роўф, які выступіць са справаздачай «25 гадоў пераходу да рынку: посткамуністычная Еўропа і МВФ».
Джэймс Роўф завітае ў Мінск з Варшавы, дзе ён працуе ў рэгіянальным офісе МВФ, які займаецца эканамічнымі даследаваннямі і аналітыкай па краінах Цэнтральнай і Усходняй Еўропы, уключна і з Беларуссю. Спадар Роўф прэзентуе справаздачу МВФ «25 гадоў пераходу да рынку: посткамуністычная Еўропа і МВФ». У прыватнасці, ён спыніцца на гісторыі эканамічнага развіцця краінаў былога сацыялістычнага лагера ў 90-ыя гады і распавядзе пра тыя праблемы, з якімі яны сутыкаюцца цяпер.
Чаму адны краіны дабіліся вялікіх поспехаў, а іншыя – не? Якія праблемы ёсць сёння ў эканоміцы Беларусі і як навучыцца іх вырашаць на прыкладах суседзяў? Ці ёсць у Беларусі перспектывы на еўрапейскім рынку? Як «сацыяльнасць» дзяржавы можа дрэнна ўплываць на эканамічны рост? Чаму Беларусь – апошняя посткамуністычная краіна, якая не скончыла прыватызацыю, і ці гэта так дрэнна? Як МВФ дапамагае Беларусі? Аб гэтым спадар Роўф неўзабаве распавядзе на сустрэчы.
Узяць удзел у спатканні запрашаюцца беларускія аналітыкі, даследчыкі, выкладчыкі, прадстаўнікі экспертных колаў, ураду, медыяў, дыпламаты, а таксама зацікаўленая грамадскасць.
Сустрэча пройдзе 19:00-20:30 у бізнес-клубе Imaguru (Фабрыцыўса 4 (ст.м. Інстытут Культуры)). Уваход вольны.
Аб спікеры
Джэймс Роўф (James Roaf) - старшы прадстаўнік МВФ па Цэнтральнай і Ўсходняй Еўропе. Працуе ў МВФ 17 гадоў, у мінулым займаў пасаду старшыні аднаго з аддзелаў дэпартамента стратэгіі, палітыкі і перагляда МВФ (Division Chief at Strategy, Policy, and Review Department), яшчэ раней быў прадстаўніком МВФ у Балгарыі. У асноўным займаецца эканамічнымі даследваннямі, але, паміж іншым, з’яўляецца аўтарам справаздачы «Карупцыя ў Расіі», якую ён напісаў яшчэ ў 2000 годзе. Цяпер жыве ў Варшаве.
