Суд у калоніі над палітвязнем, былым кандыдатам у прэзідэнты Міколам Статкевічам пройдзе 4 мая.
Аб тым, што Мікалая Статкевіча чакае чарговы суд стала вядома 13 красавіка. Па словах жонкі палітвязня Марыны Адамовіч, у калоніі патлумачылі гэта нібыта шматлікімі парушэннямі рэжыму. У пачатку красавіка на Статкевіча склалі 8 актаў аб парушэнні рэжыму цягам аднаго тыдня. Палітвязень быў пазбаўлены кароткатэрміновага спаткання, якое планавалася ў гэтым месяцы і прадуктовай перадачы, правёў тры дні ў штрафным ізалятары.
А сёння стала вядома, што суддзя ўжо наведаў калонію.
«З першага дня, як стала вядома пра суд, Мікола адразу напісаў заяву на адваката. А сёння адвакат мне раптам тэлефануе, што суддзя ўжо ў калоніі, — каментуе сітуацыю Марына Адамовіч. — А сам адвакат пра гэта не ведаў. Таму напісалі патрабаванне аб пераносе суда. Яго задаволілі і перанеслі на 4 мая. Што там здарылася, ці яны хацелі правесці той суд ціхенька, каб ніхто не ведаў, ці гэта проста звыяайнае галавацяпства, я пакуль і сама не ведаю. Увогуле, звестак пакуль не шмат».
***
Нагадаем, што Мікола Статкевіч — адзіны кандыдат у прэзідэнты Беларусі на выбарах 2010 года, які знаходзіцца ў зняволенні. У маі 2011-га ён быў прысуджаны да шасці гадоў пазбаўлення волі паводле абвінавачвання ў арганізацыі масавых беспарадкаў у дзень прэзідэнцкіх выбараў. Міжнародныя праваабарончыя арганізацыі прызналі Статкевіча палітычным вязнем. Першапачаткова асуджаны палітык адбываў пакаранне ў шклоўскай калоніі №17, аднак у студзені 2012-га яму зрабілі больш жорсткія варункі і перавялі ў магілёўскую турму №4 на тры гады. Па заканчэнні гэтага тэрміну 12 студзеня гэтага года Статкевіч вярнуўся ў шклоўскую калонію. Цяпер палітыку пагражае новы турэмны тэрмін.
