Пра гэта пішуць у сацыяльных сетках. Суполка «Беларусь і Расія разам назаўжды! Русь маладая!» паведамляе: «Аднадумцы, што хочуць прыняць удзел у штогодавай акцыі Георгіеўская стужка, а таксама тыя, хто хоча атрымаць стужкі бясплатна, пішыце Сяргею Лушчу».
Сяргей Лушч – гэта лідар «Румола». Палітолаг Ігар Лялькоў у матэрыяле аб прарасійскіх сілах у Беларусі адзначаў: «Сяргей Лушч мае выдатныя адносіны як з беларускімі ўладамі (па лініі «афіцыйнай моладзевай палітыкі»), так і з пасольствам РФ у Мінску (па лініі Рассупрацоўніцтва, правядзення разнастайных канферэнцыяў, спартовых турніраў па каратэ і г.д.)».
Адзначаецца, што 6 мая па адрасе Камуністычная, 86 (уваход злева ад галоўнага) а 16 гадзіне адбудзецца каардынацыйны сход. Сама акцыя адбудзецца 7-8 мая.
Некалькі дзён таму на сайце «Русі маладой» з’явіўся матэрыял «Навіны аб забароне георгіеўскіх стужак у Беларусі і Казахстане – фэйк» за аўтарствам Сяргея Лушча.
«Відавочна, што дадзены ўкід ў духу спадчыннікаў гебельсаўскай прапаганды, які выйшаў на старонках жоўтага апазіцыйнай інтэрнэт-сайта, дзе Расію называюць не інакш як агрэсарам, а жыхароў Данбаса - тэрарыстамі, нельга ўспрымаць у цэлым як нешта адэкватнае», – напісаў Лушч.
Варта адзначыць, што з гэтага года на афіцыйных мерапрыемствах у Беларусі выкарыстоўваюцца стужкі ў колер дзяржаўнага сцяга з яблыневым цветам. Гэты сімвал прапанавалі на студзеньскім з’ездзе БРСМ, яго падтрымаў Лукашэнка. Ніхто з чынавенства не прымацоўвае да свайго адзення георгіеўскую стужку.
Пасля таго, як баевікі на Усходзе сталі выкарыстоўваць георгіеўскую стужку для ўласнай ідэнтыфікацыі, яна набыла іншы сэнс, перастаўшы быць нейтральным сімвалам.
