Нашумелая гісторыя з гомельскім доктарам, у якога падатковая інспекцыя канфіскавала «лішні» алкаголь, пакінула больш пытанняў, чым адказаў. Да прыкладу, якім чынам інфармацыя пра алкагольныя запасы стала вядомая падаткавікам і на якіх падставах яны атрымалі доступ да бара.
Днямі падатковая інспекцыя Савецкага раёна Гомеля расказала пра мясцовага жыхара, у якога дома захоўвалася каля 200 бутэлек розных алкагольных напояў. А паводле Адміністрацыйнага кодэкса захоўваць можна толькі 15 літраў алкаголю, набытага ў Беларусі — з айчыннымі акцызамі, і 5 літраў набытага за мяжой. У выніку падаткавікі канфіскавалі ў запаслівага доктара 178 бутэлек каньяку, віскі, гарэлкі, віна ды іншых напояў. І аштрафавалі на 2 мільёны рублёў.
Гэта каб вы ведалі, што можна захоўваць дома. Бо, як кажуць, няведанне закона не вызваляе ад адказнасці. Але як справа дайшла да адказнасці, як і з якой нагоды падаткавікі дабраліся да бара?
Разам са следчымі Следчага камітэта, кажа начальнік падатковай інспекцыі па Савецкім раёне Гомеля Канстанцін Трацэўскі.
Канстанцін Трацэўскі: «Падатковыя органы не могуць зайсці ў жытло без санкцыі, вы ж разумееце. І тут усё адбывалася ў межах крымінальнай справы».
Такім чынам, усё проста: Следчы камітэт у межах крымінальнай справы праводзіў у доме доктара ператрус, следчыя зазірнулі ў бар і… запрасілі далучыцца падаткавікоў. Гэтую інфармацыю Еўрарадыё пацвярджаюць і ў прэс-службе Следчага камітэта.
«У вытворчасці Упраўлення Следчага камітэта па Гомельскай вобласці знаходзілася крымінальная справа ў дачыненні да мужчыны 1954 года нараджэння па артыкуле 433 «Атрыманне незаконнага ўзнагароджання».
Што да гэтай крымінальнай справы, то, кажуць у Следчым камітэце, яна была «цалкам расследаваная, віна гэтага чалавека ўстаноўленая, ён яе прызнаў, і крымінальная справа з прычыны сталага ўзросту чалавека і яго раскаяння была спыненая на нерэабілітуючых падставах».
Адказваючы на нашы пытанні, прадстаўнік Следчага камітэта шчыра здзіўляўся: расследаванне было завершанае, а справа спыненая яшчэ ў лютым — чаго падаткавікі ўспомнілі яе толькі цяпер?
Канстанцін Трацэўскі: «Спецыфіка нашай вобласці — мы памежжа з Украінай і Расіяй. І мы на гэтым прыкладзе проста тлумачылі заканадаўства: што ёсць 5 літраў, ёсць 30 бутэлек і гэтак далей. Бо людзі з гэтым сутыкаюцца, але пра гэта не думаюць».
А які далейшы лёс канфіскаваных 178 бутэлек алкаголю?
Канстанцін Трацэўскі: «Увесь алкаголь ідзе на знішчэнне. Бо невядома ж, з чаго ён там».
Называць прозвішча доктара ў Следчым камітэце адмаўляюцца, хоць справа па атрыманні ім «незаконнага ўзнагароджання» і была завершаная. Таму адно пытанне гэтай гісторыі застаецца без адказу: па якім прынцыпе мужчына выбіраў, якія з тых амаль 200 бутэлек ён пакіне сабе?
