Калі Саюз еўрапейскіх футбольных асацыяцый (УЕФА) вырашыць байкатаваць футбольны чэмпіянат свету, Англія з энтузіязмам падтрымае гэтую ініцыятыву. Пра гэта заявіў кіраўнік Футбольнай асацыяцыі Англіі Грэг Дайк ў сувязі з перавыбраннем Ёзэфа Блатэра прэзідэнтам ФІФА на пяты тэрмін.
«Большая частка краін Еўропы прагаласавала супраць Блатэра, як і ўся Лацінская Амерыка. Гэтыя два рэгіёны, па сутнасці, і ёсць чэмпіянат свету, — заявіў Дайк. — Калі б УЕФА выступіў супраць удзелу еўрапейскіх краін у чэмпіянаце свету, то мы дакладна маглі б падтрымаць гэтае рашэнне». Ён удакладніў, што не верыць у гатоўнасць усяго УЕФА ў дадзены момант байкатаваць чэмпіянат. На яго думку, толькі асобныя краіны б далучыліся.
Пра магчымасць байкатаваць будучы чэмпіянат свету па футболе ў выпадку абрання Блатэра яшчэ да галасавання заявіў кіраўнік УЕФА Мішэль Плаціні.
Блатэр і яшчэ некалькі чыноўнікаў ФІФА могуць быць у бліжэйшы час дапытаныя швейцарскай паліцыяй з нагоды магчымых карупцыйных парушэнняў пры выбары краін, якія прымаюць чэмпіянаты свету 2018 (Расія) і 2022 (Катар) гадоў.
