«Памятаеце шуміху вакол адкрыцця ў Сербіі кавярні з мякка кажучы нечаканай назвай «Пуцін»?» — піша блогер plintusss.
Дзякуючы гэтаму кафэ ў жніўні мінулага года невялікая вулачка ў горадзе Новы-Сад ператварылася ў меку для замежных журналістаў. Асабліва рваліся паглядзець на гастранамічнага «Пуціна» расійскія СМІ, яны ж і пісалі пра яго больш за ўсіх, з непрытоеным гонарам, ледзь не са слязьмі захаплення.
Блогер-падарожнік піша, што на месцы яго чакаў сюрпрыз: «Пуціна» ў Новым Садзе больш няма.
Зачынілі ціха. І на гэты раз без шуміхі ў СМІ. Дзіўна, бо ўладальнік кавярні ў інтэрв'ю расійскім СМІ запэўніваў журналістаў, што выгада для яго не галоўнае. «Аднак рынак як заўсёды ўсё разруліць», — піша блогер.
На месцы «Пуціна» цяпер звычайная крама без назвы, дзе прадаюць сэндвічы.
«Закрылася, больш за месяц таму, — развяла рукамі прадавачка з суседняй крамы. — Напэўна, бізнэс не пайшоў».
