Каля трыццаці чалавек бяруць удзел у другой сесіі кангрэса за незалежнасць Беларусі, які праходзіць 7 чэрвеня ў Мінску.
Грамадска-палітычны форум ініцыяваны грамадскім аб'яднаннем «Таварыства беларускай мовы імя Францішка Скарыны» і Радай беларускай інтэлігенцыі.
Сярод удзельнікаў другой сесіі кангрэса, акрамя прадстаўнікоў арганізацый-ініцыятараў, — прадстаўнікі Партыі БНФ, руху «За дзяржаўнасць і незалежнасць Беларусі», Беларускай сацыяльна-дэмакратычнай партыі (Грамада), Ліберальна-дэмакратычнай партыі Беларусі і іншых палітычных сіл.
На адкрыцці форуму намеснік старшыні ТБМ Алена Анісім нагадала, што першая сесія кангрэса адбылася ў канцы снежня мінулага года. Яна адзначыла, што неабходнасць такога кангрэса наспела, бо «сітуацыя ў свеце змянілася кардынальна» і «паўстала пытанне аб самім існаванні незалежнай беларускай дзяржавы».
На цяперашняй сесіі кангрэса за незалежнасць удзельнікі абмяркоўваюць палітычную сітуацыю ў свеце і ў Беларусі, у тым ліку наступныя прэзідэнцкія выбары.
Ініцыятары форуму запрасілі выступіць некалькіх экспертаў, у прыватнасці палітолагаў Андрэя Фёдарава і Сяргея Нікалюка.