Няпарныя шаўкапрады знішчаюць усю зеляніну на сваім шляху: агароды і стогадовыя дубы, а спробы сабраць шкоднікаў сканчаюцца алергіяй.
Напачатку іх выявілі ў вёсцы Канюхі Маладзечанскага раёна.
У інспекцыі па насенняводстве, каранціне і ахове раслін Маладзечанскага раёна мяркуюць, што змагацца з шаўкапрадам павінны самі людзі і пазбавіцца ад шкоднікаў можна толькі хімічным метадам.
Як распавёў старшыня Гарадзілаўскага сельскага выканаўчага камітэта Віктар Станішэўскі, нашэсце закранула і тэрыторыю пасёлка Беразінскае.
Каб прадухіліць непажаданыя наступствы, кіраўніцтва населенага пункта, які знаходзіцца паблізу вёскі ачага нашэсця (вёскі Канюхі), выклікала спецыялістаў.
«Пакуль у нас зачапіла толькі самы пачатак пасёлка. Але калі вусеня не спыніць, хто ведае, што будзе. А ў нас пладовыя дрэвы, кляны, дубы векавыя. Таму не ведаю, што робяць нашы суседзі (Палачанскі сельвыканкам), але мы звярнуліся ў станцыю аховы раслін і чакаем заўтра іх спецыяліста. Калі ён вызначыць маштабы нашэсця і від вусеняў, будзем думаць, што рабіць», — падзяліўся старшыня сельвыканкама.
Па словах Віктара Станішэўскага, яшчэ летась да яго звярталіся некалькі жыхароў з алергіяй, на гародах якіх пасяліўся вусень шаўкапрада. Тады эксперты, якіх выклікалі ў пасёлак, далі рэкамендацыю жыхарам Беразінскага: не чапаць вусеняў рукамі.
— Рэч у тым, — адзначае старшыня сельвыканкама, — што гэта ўжо другая цёплая зіма і яны проста не замярзаюць. Вось у гэтым годзе яна зноў дала патомства.
На памяці старшыні Гарадзілаўскага сельвыканкама нічога такога ў іх яшчэ не было.
А начальнік інспекцыі па насенняводстве, каранціне і ахове раслін Маладзечанскага раёна Дзяніс Балдоўскі мяркуе, што ў вёсцы Канюхі вусені распладзіліся ў такой колькасці па віне саміх уладальнікаў садоў і агародаў.
«Жыхары вёскі не знішчылі павуціністыя коканы восенню, што і прывяло да масавага размнажэння, і як вынік — знішчэння дрэў і іншай расліннасці», — падкрэсліў спецыяліст.
Паводле слоў спецыяліста, такі выпадак быў і ў Палачанскім сельсавеце. З мінулага года вусені «перазімавалі», а потым распладзіліся на дрэве і з'елі ўвесь сад.
— Што тычыцца барацьбы з вусенем, то ў Маладзечанскім раёне няма канкрэтнай арганізацыі, спецыялісты якой прыедуць і знішчаць шкоднікаў.
Інспекцыя таксама не можа даць жыхарам вёскі матэрыяльныя рэсурсы — прэпараты, тэхніку. Наш абавязак — дапамагаць толькі інфармацыйна: у выпадку звароту пракансультаваць і расказаць, якія прэпараты выкарыстоўваць, у якіх дозах. Таксама мы працуем і з сельгаспрадпрыемствамі, аказваючы ім інфармацыйную дапамогу. Усе прэпараты ў барацьбе з шкоднікамі сельгаспрадпрыемствы купляюць за ўласныя сродкі, — адзначыў спецыяліст.
Змагацца з шкоднікамі павінны самі людзі, адзначыў Дзяніс Балдоўскі. Зараз жыхары вёскі Канюхі могуць пазбавіцца ад вусеняў толькі хімічным метадам.
— Калі выконваць тэхніку бяспекі і строга прытрымлівацца рэгламенту выкарыстання прэпаратаў, хімікаты не прычыняць здароўю ніякай шкоды. Мы раскажам людзям, як правільна і якімі прэпаратамі апрацоўваць дрэвы і расліннасць, — адзначыў Дзяніс Балдоўскі.
Няпарны шаўкапрад — гэта не прышлы монстр, а звыклы для Беларусі від. Не трэба яго блытаць з тутавым шаўкапрадам, які разводзяць для вырабу шоўку. Але калі раней няпарны шаўкапрад сустракаўся найбольш на поўдні і лакальна, то цяпер міграваў і стаў імкліва размнажацца. Прычына гэтага сёлета — цёплыя, сухія зіма і вясна гэтага года. Спыніць распаўсюд яго можа дажджыстае надвор'е, якое замінае параванню матылькоў шаўкапрадаў і прыводзіць да адкладання неаплодненых яек.
Навукоўцы зафіксавалі, што, калі ў наваколлі няма ўлюбёных дубоў, ліпаў, сліваў, шаўкапрады грызуць нават маладыя дрэўцы хваёвых парод. Сапраўдная з'ежа!
