У рэдакцыю TUT.BY звярнуўся карыстальнік партала, які распавёў, што стаў відавочцам таго, што беларускія вайскоўцы збілі расійскі беспілотнік.
«28 мая я гасцяваў у сяброў у Мсціслаўскім раёне Магілёўскай вобласці. Калі я ўвечары катаўся на ровары ў раёне вёскі Картыжы, то заўважыў у паветры, дзесьці ў 200 метрах над зямлёй маленькі самалёцік», — распавёў Валянцін.
Ён спыніўся паназіраць за палётам, і ўбачыў проста над самалётам успышку, а потым пачуў гук «як пры салюце». Самалёт перакуліўся ў паветры і ўпаў непадалёк ад лесу.
«Я спачатку не мог зразумець, што адбылося, але калі праз некалькі хвілін пад'ехаў да месца падзення самалёта, то ўбачыў, што ён зусім невялікі — метры тры ўдоўжкі і два ўшыркі, і без лётчыка. Тады я зразумеў, што гэта беспілотнік», — растлумачыў сведка, адзначыўшы, што не ўбачыў якіх-небудзь апазнавальных знакаў на фюзеляжы.
Па словах відавочцы, хвілін праз 10 пасля падзення беспілотніка на месца здарэння прыбылі беларускія вайскоўцы на дзвюх машынах, «УАЗ» і «Урале».
«Яны ачапілі месца падзення і сталі мяне распытваць, што я бачыў, а потым папрасілі сысці», — распавёў Валянцін.
Прыехаўшы дадому, сведка паспрабаваў самастойна апазнаць беспілотнік. Валянцін мяркуе, што больш за ўсё ўбачаны ім лятальны апарат падобны на БПЛА «Птеро-G0», са складу беспілотнага авіяцыйнага комплексу «Птеро-СМ» расійскай вытворчасці.
Мяркуючы па апісанні апарата на сайце вытворцы, ён прызначаны для вядзення «аэра- і фотаздымкі, вулічных і лінейных аб'ектаў, ацэнкі радыёэлектроннай абстаноўкі, у тым ліку выяўлення крыніц перашкод і вымярэння дыяграмы накіраванасці антэнных сістэм».
Такія комплексы, прынамсі паводле афіцыйных паведамленняў Міністэрства абароны, не знаходзяцца на ўзбраенні беларускай арміі, але актыўна выкарыстоўваюцца ў расійскай. Адзначым, што комплексы «Птеро-СМ» таксама выкарыстоўваюцца і іншымі расійскімі структурамі — МНС, паліцыяй і г.д.
Атрымаць афіцыйны каментар Міністэрства абароны Беларусі з нагоды інцыдэнту ўвечары не ўдалося.
