Супрацоўнікі праваахоўных органаў знайшлі ў лясным масіве паблізу вёскі Вароніна Быхаўскага раёна труп грамадскага актывіста Аляксандра Шачанка, які знік без вестак ў жніўні мінулага года.
Як паведаміла БелаПАН афіцыйны прадстаўнік УСК па Магілёўскай вобласці Аксана Салянюк, інфармацыя пра знаходжанне ў гэтым месцы цела забітага чалавека паступіла ад затрыманага на мінулым тыдні 37-гадовага жыхара Быхава, які падазраецца ў незаконным захоўванні боепрыпасаў і крадзяжы.
«Падчас правільна праведзенага допыту падазраваны прызнаўся ў больш цяжкім злачынстве — забойстве, а таксама паведаміў месцазнаходжанне трупа», — расказала яна.
27 чэрвеня следчыя, якія выехалі на месца, сапраўды выявілі астанкі чалавека, якія, як мяркуецца, належаць абвешчанаму летась без вестак зніклым 63-гадоваму Аляксандру Шачанку.
Як растлумачыла Аксана Салянюк, падазраваны ўчыніў злачынства з прычыны непрыязных адносін да забітага.
Нагадаем, апошні раз Шачанка бачылі 27 жніўня 2014 года ў Быхаўскім раённым судзе, дзе праходзіў разгляд іску актывіста ў дачыненні да яго суседа, які абвінавачваўся ў нанясенні цяжкіх цялесных пашкоджанняў. На маючым адбыцца апошнім пасяджэнні меркавалася, што Аляксандр Шачанок выступіць з хадайніцтвам пра змяненне меры стрымання адказчыку, паколькі той нібыта выказваў пагрозы ў яго адрас.
