 Здымак Беларусь-Фота |
Міністар зрабіў невялікі экскурс у гісторыю беларускай арміі. На яго думку, адразу пасьля развалу Савецкага Саюзу будаўніцтва беларускай арміі, як войска незалежнай дзяржавы зьдзяйсьнялася з сыстэмнымі памылкамі. «У той час у краіне не было нават канцэпцыі нацыянальнай бясьпекі», — кажа Л. Мальцаў. Таму ў 1994 годзе армія падтрымала абраньне на прэзыдэнцтва Аляксандра Лукашэнкі.
Як лічыць сп. Мальцаў, пытаньне кантрактнай ці тэрміновай службы не заслугоўвае такой увагі, якую надаюць гэтай праблеме СМІ. «Камплектаваньне арміі — унутраная справа самой дзяржавы, нам тут непатрэбныя парады з‑за бугра. Маўляў, мы такія крутыя, што перайшлі на кантрактную службу, а вы не крутыя — бо не перайшлі. Ад тэрміновай службы мы адмаўляцца не зьбіраемся. Праўда, цяпер вядзецца праца па зьмяншэньні тэрміновай вайсковай службы. Тыя, хто мае вышэйшую адукацыю будзе служыць дзевяць месяцаў, а тыя, хто не — год. Замест сёньняшніх году і паўтара. Цяпер ў Беларусі вялізная колькасьць адтэрміновак. Напэўна, найбольшая з усіх краін, дзе ёсьць тэрміновая служба. Мы даем адтэрміноўкі нават выпускнікам СНУ і ПТВ, каб тыя змаглі паступаць ва ўнівэрсытэты, а не вінавацілі войска ва ўласных паламаных лёсах», — сказаў Мальцаў.
Пракамэнтаваў Мальцаў і выпадак з гомельскім актывістам апазыцыі Зьмітром Жалезьнічэнкам, якога прызвалі ў войска на трэці дзень пасьля афіцыйнага адлічэньня з ВНУ, ня даўшы хлопцу нават абскардзіць рашэньне ў судзе.
«Міністар абароны ня мае да гэтага выпадка ніякага дачыненьня. Зьвяртайцеся ў абласныя тэрытарыяльныя органы, якія зьдзяйсьнялі прызыў. Праблем зь беларускай мовай у войску не было і ня будзе. Напрыклад, прысягу Жалезьнічэнка мог прымаць на любой дзяржаўнай мове, але не зрабіў гэтага — гэта яго права. Калі ёсьць жаданьне, то загады ён будзе атрымліваць па‑беларуску. Няма праблем. Але, калі ён адзін такі, то гаварыць пра гэта бессэнсоўна, трэба, каб такіх салдатаў бы хоць бы узвод. Ёсьць праблема ў сьвядомасьці людзей, якія ня хочуць зьдзяйсьняць свой канстытуцыйны абавязак. Кідаць лёзунгі яны могуць, а даць свой прыклад ня могуць. Тут некаторыя паказваць непавагу да свайго народу. Падчас прысягі я быў у Баранавічах, дзе размаўляў з навабранцамі. У аднаго хлопца была такая ж сытуацыя, як у Жалезьнічэнкі. Ён пераводзіўся з аднаго ВНУ ў іншага і страціў магчымасьць на адтэрміноўку. За гэты час яго забралі ў войска. Ён сказаў мне, калі так склалася, то ягоны абавязак адслужыць патрэбны тэрмін.
На патрэбы войска сёньня ідуць толькі бюджэтныя сродкі, хаця яшчэ тры гады таму былі і іншыя па‑за бюджэтныя крыніцы фінансаваньня. Агулам на войска сёньня выдзяляецца 1,3 % ад ВУП краіны. Міністар прывёў прыклад, што ў краінах з блёку NATO такі паказьнік складае 2 %.
Мальцаў прызнаўся, што з усталяваньнем у Польшчы і Чэхіі установак супрацьраскетнай абароны павысіцца ўзровень нацыянальнай небясьпекі краіны. Але спадар Мальцаў зазначыў, што гэта ўнутраная справа гэтых дзяржаваў. «Вайскоўцы не павінны лезьці ў палітыку», — перакананы Л.Мальцаў.
Расказаў міністар абароны і пра ўласныя заробкі. Так, зарплата сп.Мальцава прыкладна складае 3 мільёны 700 тысяч рублёў. «Жонцы аддаю ўсё», — кажа ён. Тады як звычайны кантрактнік атрымлівае крыху болей за 600 тысяч. «Заробкі ў арміі будуць павышацца гарманічна з усімі астатнімі грамадзянамі, а не асобна», — паведаміў Л.Мальцаў.
 |
 Расказваючы пра тое, што праблем зь беларускай мовай у войску не было і ня будзе, Мальцаў дэманстраваў журналістам Баявы статут пяхоты РСЧА на беларускай мове |
 |
