Мастак Лявон Тарасэвіч паставіў драўляную сяміметровую вежу ў польскіх Катавіцах
Новы твор вядомага мастака ўяўляе сабою інсталяцыю ў форме вежы з дошак, вышынёй сем метраў і шырынёй дзевяць. Дошкі зверху памаляваныя сіняй фарбай. Інсталяцыя мае назву «Modry» (Сіні).
Лявон Тарасэвіч кажа, што сваім творам хацеў паказаць, што магчыма пераломваць рэгіянальныя стэрэатыпы.
«Стэрэатып такі, што Слёнск — гэта вугаль, шахты, гарнякі. Гэта так, як бы звесьці ўсю Беласточчыну да бульбы. Я хацеў зрабіць нешта, што павярнула б мысленне пра Слёнск у іншы бок, дазволіла б дакрануцца да ўніверсальнага. І пад зямлёю можна знайсьці кавалак блакіту», — цытуе Тарасэвіча Gazeta Wyborcza.
Лявон Тарасэвіч, народжаны ў 1957 годзе ў Валілах каля Гарадка на Беласточчыне, належыць да найбольш вядомых мастакоў у Польшчы. З'яўляецца прафесарам Акадэміі мастацтваў у Варшаве. Падкрэслівае сваё беларускае паходжанне і бярэ актыўны ўдзел у жыцці беларускай меншасці ў Польшчы. Адзін з заснавальнікаў штогадовага беларускага фестывалю «Басовішча». Жыве ў Валілах, дзе гадуе дэкаратыўных курэй, галубоў і фазанаў.
Цяпер чытаюць
«Была галоднай, узімку аказалася без цёплых рэчаў». Суседкі расказваюць пра памерлую экс-палітзняволеную Ганну Кандраценка1
Каментары