На Нацыянальным прававым партале Рэспублікі Беларусь апублікаваны Указ прэзідэнта ад 2 ліпеня 2015 года №299 «Аб прызначэнні і вызваленні суддзяў». Здавалася б, нічога асаблівага, калі б не вызваленне ад пасад адразу чатырох высокапастаўленых суддзяў Эканамічнага (былога гаспадарчага) суда г. Мінска ў сувязі з учыненнем імі нейкай правіны.
Сваіх пасадаў пазбавіліся былы старшыня эканамічнага суда Мінска Ігар Ждановіч, яго намеснік Сяргей Кулакоўскі, суддзі Алег Клюйко і Андрэй Рыбалкін.
Андрэй Рыбалкін
Паведамляецца, што гэта адбылося «ў сувязі з учыненнем правіны, несумяшчальнай са знаходжаннем на дзяржаўнай службе (артыкул 124 Кодэкса Рэспублікі Беларусь аб судаўладкаванні і статусе суддзяў)».
Алег Клюйко
Ждановіч прасядзеў на сваёй пасадзе не так доўга – ён быў прызначаны старшынёй ў студзені 2014. З'яўляўся старшынёй гаспадарчага суда Мінска з моманту стварэння суда, з 1 студзеня 1999 года.
Ігар Ждановіч
Да гэтага працаваў у органах пракуратуры Рэспублікі Беларусь, народным суддзёй, старшынёй суда Цэнтральнага раёна Мінска, намеснікам старшыні Найвышэйшага гаспадарчага суда Рэспублікі Беларусь. Яму прысвоены першы кваліфікацыйны клас.
Сяргей Кулакоўскі
Яго намеснік Сяргей Кулакоўскі — родам з Гродна. Пасаду намесніка ён займаў з 13 верасня 2010. Да гэтага працаваў суддзёй Гаспадарчага суда Гродзенскай вобласці, суддзёй Найвышэйшага гаспадарчага суда Рэспублікі Беларусь. Яму таксама прысвоены першы кваліфікацыйны клас.
Чуткі аб маючым адбыцца звальненні названых суддзяў хадзілі ў юрыдычных колах даволі працяглы час, з моманту затрымання супрацоўнікамі КДБ Беларусі суддзі гэтага ж суда Юрыя Грушэцкага. Яму інкрымінуецца атрыманне хабару (ч.3 арт.430 - атрыманне хабару асобай, якая займае адказнае становішча). Санкцыі па гэтым артыкуле прадугледжваюць пазбаўленне волі на тэрмін ад 5 да 15 гадоў з канфіскацыяй маёмасці. Грушэцкага затрымалі яшчэ ў лютым гэтага года.
