ЦВК ясна растлумачыла, чаму не будзе рэгістраваць графа Прушынскага кандыдатам у прэзідэнты
Стала вядома, што Цэнтрвыбаркам не зарэгіструе ініцыятыўную групу па вылучэнні ў кандыдаты Аляксандра Прушынскага. Прычыны называліся самымі рознымі. Маўляў, у графа няма беларускага грамадзянства, ці народжаныя ў Заходняй Беларусі да 1939 года прыраўніваюцца да замежных грамадзян. Як выявілася, тут насамрэч сплаў першага і другога фактараў.
У юрыдычным аддзеле ЦВК «Нашай Ніве» патлумачылі, што ініцыятыўная група Аляксандра Прушынскага не можа быць зарэгістравана паводле арт. 57 Выбарчага кодэксу і арт. 8 закона «Аб грамадзянстве».
Справа ў тым, што прэзідэнтам Беларусі можа стаць толькі грамадзянін Беларусі па нараджэнні. Хто ж ім лічыцца?
Грамадзяне, якія нарадзіліся на тэрыторыі сучаснай Беларусі (тут да Прушынскага пытанняў не ўзнікае, бо ён нарадзіўся ў маёнтку Вялікая Рагозніца на тэрыторыі сучаснага Мастоўскага раёна), з’яўляюцца грамадзянамі СССР па нараджэнні і атрымалі грамадзянства Беларусі да ўступлення ў сілу закона «Аб грамадзянстве». А вось з апошнім пунктам атрымліваецца загваздка. Закон быў прыняты 1 жніўня 2002 года. А граф Аляксандр Прушынскі атрымаў беларускае грамадзянства толькі ў 2007 годзе.
Таму, паводле сённяшняга заканадаўства, Прушынскі сапраўды не можа быць зарэгістраваны ў якасці кандыдата на прэзідэнцкія выбары, але на мясцовыя, ці парламенцкія – без праблем.
Аляксандр Прушынскі ў каментары для «НН» сказаў, што збіраецца абскарджваць гэтае рашэнне ў судзе. «Спачатку пракансультуюся з адным былым суддзёй Канстытуцыйнага суда, а пасля буду падаваць скаргу», — кажа Прушынскі.
Ён гаворыць, што хоча стаць прэзідэнтам, «бо аптыміст». «Тут можна многа-многа ўсяго зрабіць. А нашы чыноўнікі звыкліся сядзець на задніцы, усе хочуць, каб за іх Аляксандр Рыгоравіч зрабіў».
Аляксандр Прушынскі нарадзіўся ў 1934 годзе на Гарадзеншчыне. Да 1992 года жыў у Канадзе. Пасля пераехаў у Беларусь, дзе ў трэці раз пабраўся шлюбам. Кажа, што на канадскую пенсію ў Беларусі адчувае сябе вельмі камфортна. Прушынскі спрабаваў зарэгістравацца кандыдатам яшчэ ў 1994 годзе. Зрэшты, Прушынскі – гэта проста бяззлобны дзядуля-летуценнік, які гаворыць на цудоўнай беларуска-польска-рускай трасянцы, а не палітык.
* * *
Ярмошына пра Прушынскага: Ён чароўны, вясёлы, актыўны, але мы не можам яго зарэгістраваць
Цяпер чытаюць
Пратэжэ лукашэнкаўскага фаварыта Баскава будуе акадэмію ў Бразіліі і Нью-Васюкі сусветнага маштабу8
Каментары