Сінод Беларускай праваслаўнай царквы ўхваліў рашэнне Архірэйскай рады Мінскай мітраполіі аб тым, што трэба прыняць адзіную форму назвы прыходаў і манастыроў.
Пра гэта гаворыцца ў часопісах пасяджэння Сінода БПЦ, якія апублікаваныя на афіцыйным сайце Беларускага Экзархата.
У часопісах тлумачыцца, што ў сувязі з утварэннем новых епархій Мінскай мітраполіі ў бліжэйшы час трэба будзе ажыццявіць дзяржаўную перарэгістрацыю статутаў прыходаў і манастыроў.
«Некаторыя манастыры і прыходы былі зарэгістраваныя з прыстаўкай «Свята» («Свята-Нікольскі», «Свята-Успенскі» і г.д.), а некаторыя — з найменнем без прыстаўкі («Нікольскі» ці «Успенскі»). Гэтыя розначытанні выклікаюць у людзей пытанні накшталт: «Няўжо ёсць святыя і не святыя храмы?» — гаворыцца ў дакуменце.
У выніку яны будуць называцца без гэтай прыстаўкі.
Таксама сінод, у прыватнасці, вырашыў, што Свята-Дабравешчанскі Лядзенскі мужчынскі манастыр у вёсцы Малыя Ляды Смалявіцкага раёна Мінскай вобласці ў далейшым трэба называць: «Лядзенскі мужчынскі манастыр у гонар Дабравешчання Прасвятой Багародзіцы вёскі Малыя Ляды Смалявіцкага раёна Барысаўскай епархіі Беларускай праваслаўнай царквы».
Епіскапы, якія кіруюць нядаўна ўтворанымі ў Мінскай вобласці епархіямі, зробяць захады для своечасовай перарэгістрацыі парафій. Таксама ў часопісах тлумачыцца, што пасведчанні аб дзяржрэгістрацыі гэтых епархій (Барысаўскай, Слуцкай і Маладзечанскай) былі ўручаны епіскапам 8 красавіка 2015 года.
Сінод вырашыў таксама змяніць склад Царкоўнага суда БПЦ.