Белы дом і Пентагон ўжо пачалі абмяркоўваць, як павялічыць ціск на Расію у сувязі з парушэннем ёю Дамовы аб ліквідацыі ракет сярэдняй і малой дальнасці (РСМД).
Акрамя дыпламатычных рычагоў магчымыя меры ў эканамічнай і ваеннай сферы.
Пра гэта заявіў у панядзелак у Вашынгтоне Стывен Пайфер, былы памочнік дзяржсакратара ЗША па пытаннях Еўропы і Еўразіі, а цяпер кіраўнік дэпартамента кантролю над узбраеннямі і ініцыятывы нераспаўсюду Інстытута Брукінгса.
Стывен Пайфер (Steven Pifer). Фота: Isis Martins
«Урад ЗША вядзе дыпламатычны дыялог з Расіяй, але ён не мае поспеху на сённяшні дзень, паколькі расейцы не хочуць прызнаваць ніякіх парушэнняў», — адзначыў эксперт.
У гэтай сувязі, заўважыў ён, у дадатак да дыпламатычных намаганняў, «чыноўнікі з адміністрацыі ЗША ўжо гавораць пра эканамічныя і ваенныя сродкі».
Амерыканскія службовыя асобы пакуль адкрыта не кажуць, пра якія канкрэтныя меры ідзе гаворка. «Думаю, гэта будуць эканамічныя санкцыі ў дадатак да тых, што ЗША і ЕС увялі супраць Расіі на працягу апошніх 15-ці месяцаў пасля расійскай агрэсіі супраць Украіны», — дапусціў эксперт. Пры гэтым ён удакладніў, што такі крок павінен быць абавязкова узгоднены з саюзнікамі, у першую чаргу з тымі, якія знаходзяцца ў зоне дасягненні расійскіх ракет.
У Пентагоне таксама разглядаюць магчымыя абаронныя дзеянні, якія можна падзяліць на тры катэгорыі.
Пайфер патлумачыў: перш за ўсё, ідзе гаворка пра актыўную абарону ад удараў крылатых ракет наземнага базіравання. Другая катэгорыя, паводле яго слоў, заключаецца ў распрацоўцы магчымасцяў атакаваць пускавую пляцоўку расійскіх крылатых ракет перад тым, як яны будуць запушчаныя. Акрамя таго, у гэты комплекс таксама можа ўваходзіць ўдар у адказ па іншых важных аб'ектах.
«Гэта тое, што мы чуем ад амерыканскіх чыноўнікаў. Але я думаю, ЗША павінны зрабіць яшчэ сёе-тое», — адзначыў Пайфер. У гэтым кантэксце ён прапанаваў, у прыватнасці, склікаць спецыяльную камісію па верыфікацыі, што прадугледжана адным з пунктаў Дамовы аб РСМД.
