Новая спроба дамагчыся ад Рады Бяспекі ААН адабрэння на стварэнне трыбунала па катастрофе «Боінга» MH17 ва Украіне будзе прадпрынятая праз два месяцы, заявіў міністр замежных спраў Украіны Павел Клімкін у інтэрв'ю агенцтву Асашыэйтэд прэс.
Паводле Клімкіна, асноўным аргументам Расіі, якая наклала вета на рэзалюцыю РБ ААН аб стварэнні трыбунала, было тое, што гэты крок з'яўляецца заўчасным і несвоечасовым. Масква ўказвала на тое, што вынікі расследавання будуць гатовыя не раней за кастрычнік.
Праз два месяцы, калі будзе гатовая справаздача, пяць краін — Малайзія, Аўстралія, Нідэрланды, Бельгія і Украіна — маюць намер паўторна звярнуцца ў РБ ААН з патрабаваннем стварэння трыбунала.
''Мы не збіраемся здавацца. Праз два месяцы ў нас будзе канчатковая справаздача [аб крушэнні «Боінга»]. І што ж Расія скажа праз два месяцы? Мы, безумоўна, будзем спрабаваць зноў, выкарыстоўваючы ўсе магчымыя спосабы падтрымкі міжнароднай супольнасці», — сказаў Павел Клімкін агенцтву.
Як сказаў Клімкін, Малайзія, Аўстралія, Нідэрланды, Бельгія і Украіна лічаць, што стварэнне міжнароднага трыбунала па катастрофе «Боінга» было б найлепшым варыянтам з палітычнага і заканадаўчага пунктаў гледжання.
У сераду за прыняцце рэзалюцыі прагаласавалі 11 з 15 краін-членаў Рады Бяспекі. Ангола, Кітай і Венесуэла устрымаліся. Аднак Расія заблакавала прыняцце дакумента, скарыстаўшыся сваім правам вета, як пастаянны член Рады Бяспекі.