У Полацку распачалася падрыхтоўка да «Ночы Ваўкалака» — фэсту‑конкурсу для маладых беларускамоўных гуртоў. Арганізатарам імпрэзы выступаюць гурты Indra і мясцовая паэтка і настаўніца беларускай мовы Лера Сом:
«Мы хочам даць шанец рэалізавацца менавіта беларускамоўным гуртам, таму праводзім гэты фэст».
На Полаччыне дагэтуль праводзіўся іншы фэстываль — «Рок‑Кола», аднак арганізатарка кажа:
«Гэты фэстываль мяне адначасова і прывабліваў, і адпіхваў. Мая мэта — разьвіцьцё беларускай культуры. І я не магу прыняць беларускую культуру на расейскай мове — для мяне гэта поўны нонсэнс».
»Ноч Ваўкалака» пройдзе ўжо ў другі раз.
«Летась гэта выглядала ня так маштабна, мы проста паглядзелі, ці зможам зрабіць такую імпрэзу, а цяпер мы абвяшчаем сур’ёзны конкурс з аўтарытэтным журы і неблагім прызам — студыйны запіс песьні», — апавядае Лера Сом.
«Ноч Ваўкалака» пройдзе ў полацкім гарадзкім доме культуры 6 красавіка. Акрамя выступу канкурсантаў плянуецца прыезд знаных гасьцей. Заявы арганізатары конкурсу пачалі ўжо прымаць.
Для таго, каб мець магчымасьць паўдзельнічаць у конкурсе, трэба да 30 сакавіка падаць заяўку з наступнымі зьвесткамі:
- назва гурта;
- склад гурта;
- гісторыя гурта;
- дэманстрацыйны запіс у фармаце МР3 якасьцю ня менш за 128 кб/с + тэксты песень;
- кантактны тэлефон.
Заяўкі падаюцца на e‑mail [email protected].
