Насельніцтва Беларусі павялічваецца, але гэта дасягаецца за кошт мігрантаў. Папярэдні раз натуральны прырост фіксаваўся да прыходу да ўлады Аляксандра Лукашэнкі. Цяпер страты скараціліся да мінімальных: паводле Белстата, летась у Беларусі нарадзілася 118 534 чалавек, а памерла — 121 542.
Найлепшы прырост, вядома ж, у Мінску. За мінулы год за кошт розніцы між нараджальнасцю і смяротнасцю насельніцтва сталіцы павялічылася на 5767 чалавек.
Якія рэгіёны таксама дапамагаюць вырашыць дэмаграфічную праблему?
Спачатку да абсалютных лічбаў.
Натуральны прырост у Беларусі за 2014 год
| № | Раён | Прырост |
| 1 | Мінск | 5767 |
| 2 | Брэст і Брэсцкі раён | 2045 |
| 3 | Гродна і Гродзенскі раён | 1796 |
| 4 | Мінскі раён | 1211 |
| 5 | Магілёў і Магілёўскі раён | 676 |
| 6 | Гомель і Гомельскі раён | 489 |
| 7 | Жлобінскі раён | 431 |
| 8 | Мазырскі раён | 372 |
| 9 | Жодзіна і Смалявіцкі раён | 288 |
| 10 | Пінскі раён | 199 |
| 11 | Кобрынскі раён | 102 |
| 12 | Салігорскі раён | 72 |
| 13 | Дзяржынскі раён | 71 |
| 14 | Маладзечанскі раён | 42 |
| 15 | Столінскі раён | 27 |
| 16 | Баранавіцкі раён | 22 |
| 17 | Нараўлянскі раён | 7 |
| 18 | Ашмянскі раён | 7 |
Дадзеныя гарадоў абласнога падпарадкавання аб'ядноўваліся з раёнамі, на тэрыторыі якіх яны знаходзяцца. У выніку Віцебшчына ў спісе не прадстаўленая ніяк — у самім Віцебску і ў Наваполацку фіксаваўся прырост, але Віцебскі і Полацкі раёны мелі нашмат большыя страты.
Што да канкрэтных населеных пунктаў, то адносна вялікі прырост назіраўся ў наступных гарадах.
| № | Горад | Прырост* |
| 1 | Столін | 9,7 |
| 2 | Чачэрск | 8,2 |
| 3 | Жлобін | 8 |
| 4 | Іванава | 7,9 |
| 5 | Стоўбцы | 7,8 |
| 6 | Ашмяны | 7,6 |
| 7 | Лагойск | 7,1 |
*розніца паміж народжанымі і памерлымі на 1000 чалавек
Абсалютным лідарам стаў курортны пасёлак Нарач (індэкс прыросту — 12). У ім памерла 17 чалавек, а нарадзілася — 56 чалавек.
