Фота: telefonica.com
Міністр сувязі Беларусі Сяргей Папкоў засцярог ад занадта нізкіх цэн на роўмінг у размове з карэспандэнтамі БЕЛТА.
«Тут у нас пазіцыя неадназначная, — кажа Папкоў. — З боку абанента ўсё павінна быць танней і імкнуцца да нуля, з боку аператараў — трэба захаваць рэнтабельнасць, каб інвеставаць у далейшае развіццё тэхналогій. Таму мы спрабуем вырашыць пытанне, як зрабіць так, каб званок быў выгадны і аператару, і абаненту».
Папкоў заклікае знайсці «залатую сярэдзіну», але адзначае, што ў свеце з яе пошукам усё няпроста. У якасці прыкладу ён прыводзіць Расію, падзеленую на зоны па роўмінгу: калі абанент тэлафануе з Масквы ва Уладзівасток, званок праходзіць праз сеткі некалькіх рэгіянальных аператараў. «Хто аплаціць страты кожнага з аператараў, якія прапусцяць праз сябе трафік?» — пытае міністр.
Скасаваць плату за роўмінг ужо некалькі год прапануе Еўразійская эканамічная камісія. Яна рыхтуе праект усталявання межавых цэн на роўмінг. Згодна плану, прапанаванаму для тэрыторыі ЕАЭС, у 2015 годзе цана на хвіліну зыходнага тэлефанавання мае быць не даражэй за 1,05 еўра, у 2016-м — не даражэй за 0,68 еўра, 2017-м — 0,3 еўра. Затым планка мае абнаўляцца.
Папкоў адзначыў, што падобныя прапановы гучалі яшчэ каля 10 год таму ў межах Саюзнай дзяржавы.
«Але мы маем разумець, што ёсць разумная планка, іначай, калі будзем імкнуцца тэлефанаваць бясплатна, можам застацца без аператара», — засцярог Папкоў.
