У сувязі з пажаранебяспечнай сітуацыяй на ўсёй тэрыторыі Магілёўскай вобласці з 6 жніўня ўведзена забарона на наведванне лясоў.
Як паведаміў памочнік начальніка Магілёўскага абласнога ўпраўлення МНС Вадзім Урублеўскі, неабходнасць увядзення забароны на наведванне лясоў у гарачае надвор'е паказаў, у прыватнасці, буйны пажар у Асіповіцкім раёне.
Узгаранне каля вёскі Вярхі было зафіксавана раніцай 2 жніўня, і, паводле слоў спецыяліста, яго ўдалося ліквідаваць толькі да 18.00 учарашняга дня.
Пажар тушылі каля 260 чалавек у суткі, 40 з якіх — супрацоўнікі МНС. У тушэнні пажару было задзейнічана 26 адзінак тэхнікі, 10 з іх належаць ратавальнаму ведамству. Ваду на агонь таксама скідвалі тры верталёты МНС.
Іншых узгаранняў на тэрыторыі рэгіёну на гэты момант не зафіксавана.