Тэсціруем дастаўку дранікаў eDraniki

Сёння усё больш папулярнай робіцца дастаўка ежы. У інтэрнэце з'явілася дастаўка дранікаў і іншай беларускай кухні — edraniki.by.

Сайт зроблены даволі эрганамічна і на беларускай мове. Можна замовіць ежу як на сайце, так і па тэлефоне.

У меню ёсць як дранікі, так і іншыя прысмакі. Тут ёсць і дранікі са свінінай, вегетарыянскія з гароднінай і сырам фета, грудзінкай і грыбамі. У астатнім гэта салаты, бульба рознага смажання і напоі. Прычым акрамя сусветных Сoca-Cola, Fanta, ёсць і бярозавік. Ну што ж, пратэсціруем.

Служба дастаўкі працуе з 11:00 па 22:30 штодзённа. Для таго каб вам ператэлефанавалі, на сайце трэба пакінуць імя і кантактны мабільны нумар. Трэба падкрэсліць, што пры гэтым не абавязкова рэгістравацца на сайце. Пасля таго, як пакінулі нумар, на сайце напішуць, што запыт зарэгістраваны і чакаць тэлефанавання трэба на працягу 15 хвілін.

Ператэлефанавалі ўжо праз хвіліну. Дзяўчына размаўляла па-руску, але цалкам разумела, што ад яе хочуць па-беларуску. Мы замовілі:

Дранікі з грудзінкай ды грыбамі (93 000 б.р.)
Бульба па-вясковаму (22 000 б.р.)
Соус Heinz сырны (7 000 б.р.)
Салата з агародніны па-вясковаму (35 000 б.р.)
Бярозавік з чарніцамі (15 000 б.р.)

Карацей, стандартны набор беларускай ежы, акрамя соусу, канечне. Усё гэта разам каштавала 172 000 б.р. Дастаўка ежы ў eDranik бясплатная, але мінімальная сума замовы складае 160 000 б.р. Таму хочаш не хочаш, а на 160 тысяч прыйдзецца чагосьці набіраць. Таму лепей замаўляць у гасцях ці з сябрамі: там і менш зможаце ўзяць, і танней вам абыдзецца.

Прывезці абяцалі максімум праз 1 гадзіну 10 хвілін. Пакуль гатуецца і едзе ежа, можна пачытаць артыкул Змітра Дашкевіча пра беларускую мову ў кавярнях.

Ад тэлефанавання да дастаўкі ежы прайшло ўсяго 38 хвілін, як ужо кур’ер грукае ў дзверы. Прыемны хлопец усходняга выгляду прывёз два пакеты, з якіх ішоў дужа смачны пах. Хлопец быў у вышымайцы ад symbal.by. Разлічыўшыся, ён пажадаў «пріятного аппетіта» і пабег.

І тут першая праблема: у замове адсутнічаў бярозавік, за які грошы былі аддадзеныя, не было чэку, а замест сырнага соусу Heinz паклалі дзве смятаны.

Мы патэлефанавалі ў call-цэнтр, дзяўчына выбачылася і паабяцала вярнуць кур'ера ў вышымайцы. Праз 20 хвілін кур’ер вярнуўся, папрасіў прабачэнні за нязручнасці, аддаў бярозавік і чэк. Час затэсціць ежу.

Салата

Салата аказалася свежай. Складалася ўражанне, што бабуля вось толькі нарвала гародніны з агароду і змяшала гэта ўсё ў адну талерку. Такі лёгкі, летні кактэйль з гародніны. У складзе памідоры, агуркі, кроп ды радыска. Добрае выйсце для тых, хто на дыеце. Але радысу было зашмат, што рабіла страву гаркавай.

Дранікі з грудзінкай ды грыбамі

Дранікі заліковыя. Але зусім нязручны посуд прыдумалі да іх. Скажыце, ну хто кладзе дранікі ў скрыню для кітайскай локшыны? Калі ясі, там з дранікаў каша робіцца.

А так, калі не заўважаць гэты факт, то смак вельмі прыстойны. Усё прасмажана, як быццам гатавалася ў вясковай печы. Гарніру было дастаткова. Спалучэнне грыбоў, шынкі, цыбулі і нейкага соусу давала цудоўны пах і смак.

Бульба па-вясковаму

7 кавалкаў бульбы ў невялічкай пушцы. Па сутнасці, нічым не розніцца ад бульбы ў мінскіх фаст-фудах. Сырнага соусу так і не далі, таму будзем есці са смятанай. Зразумела, што лепей недасаліць, чым перасаліць, але гэтыя кухары дакладна ніколі не закахаюцца. Солі не было ні грама. Хаця мо каму і падабаецца. Карацей, на аматара.

Пасля трэцяга кавалка бульбы становіцца суха ў горле, нават са смятанай. Таму абавязкова трэба, каб у вас было нешта пад рукой папіць. Але калі есці разам з салатай, то магчыма будзе не так уж і кепска.

Бярозавік з чарніцамі

Пасля такой ежы са стоадсоткавай верагоднасцю вам захочацца піць. EDranik прапаноўвае тры віды бярозавіку: звычайны, з чарніцамі і з шыпшынай. Што з сябе ўяўляе бярозавік з чарніцамі? На пах і смак не адчуць гэтых чарніц, але адчуць сапраўдны смак бярозавага соку. Карацей, на запіць вам хопіць.