Органы апекі Івацэвіцкага раёна ўсё яшчэ не прынялі рашэнне пра далейшы лёс Косці — хлопчыка, якога 21 ліпеня нарадзіла інвалід 1-й групы Ганна Бахур. Як растлумачылі TUT.BY ў раённым аддзеле адукацыі, на дадзены момант ужо ёсць адзін кандыдат на апякунства.
Станіслаў Коршунаў, TUT.BY
21 жніўня Ганну і Косцю Бахур у Івацэвіцкай ЦРБ зноў наведвалі дактары. Гэтым разам прыехалі спецыялісты з Мінска. Як паведаміла галоўны педыятр Міністэрства аховы здароўя Валянціна Ваўчок, якая была адным з членаў дэлегацыі, сталічныя лекары прыйшлі да такога ж меркавання, што і іх раённыя калегі. Дыягназы Ганны і яе мужа Анатоля падпадаюць пад пералік захворванняў, зацверджаны Міністэрствам аховы здароўя, пры якіх яны не могуць выконваць бацькоўскія абавязкі. Нагадаем, у Ганны — прыроджаная анамалія канечнасцяў, у Анатоля — ДЦП. Абое маюць першую групу інваліднасці.
У той жа самы час Валянціна Ваўчок падкрэсліла, што пытанне далейшага лёсу дзіцяці трэба будзе вырашаць органам апекі. «У нашу кампетэнцыю не ўваходзяць такія рашэнні», — патлумачыла суразмоўца.
Намеснік старшыні Івацэвіцкага райвыканкама Аляксандр Велікаселец, які курыруе пытанні сацыяльнай сферы, паведаміў TUT.BY, што на дадзены момант у распараджэнні органаў апекі маецца толькі заключэнне лекарска-кансультацыйнай камісіі Івацэвіцкай ЦРБ аб тым, што ў Ганны і Анатоля захворванні, пры якіх бацькі не ў стане выконваць свае абавязкі. Таму працягваецца работа па падборы апекуна для малога.
Начальнік аддзела адукацыі, спорту і турызму райвыканкама Мікалай Віннічак распавёў, што цяпер ёсць адзін кандыдат, які гатовы аформіць апеку над Косцем. Аднак якая-небудзь інфармацыя пра асобу гэтага чалавека пакуль не выдаецца.
Бацькі хлопчыка Ганна і Анатоль Бахур раней у гутарцы з TUT.BY катэгарычна адмовіліся перадаваць свайго сына апекуну. Муж і жонка настойвалі, што могуць выконваць бацькоўскія абавязкі і справяцца з выхаваннем дзіцяці.
Раённыя ўлады павінны вызначыць далейшы лёс Косці да 5 верасня. Пакуль гэта пытанне не вырашыцца, мама з сынам будуць знаходзіцца ў педыятрычным аддзяленні Івацэвіцкай ЦРБ.
Нагадаем, 19 жніўня Ганну Бахур наведала міністр сацабароны Марыяна Шчоткіна.
«Сітуацыя вельмі нестандартная. Але наогул, якая б ні была нарматыўна-прававая база, кожную сітуацыю трэба разглядаць індывідуальна. Таму тут якраз той выпадак, калі трэба прыехаць і паглядзець на месцы. Магу сказаць, што гэтая жанчына матываваная на мацярынства і разлучаць яе з дзіцём нельга. Трэба зрабіць усё, каб дзіця засталося ў сваёй сям'і. У яго ёсць бацькі. Дзіця гэта чаканае. Яны яго любяць. І, вядома, трэба і дапамагаць. Важна, каб яны маглі ажыццяўляць догляд, каб дзіця было ў бяспецы», — цытавала міністра БелТА.
