Будучыя прэзідэнцкія выбары ў Беларусі з'яўляюцца лакмусавай паперкай для ацэнкі шансаў па перазагрузцы адносін паміж Беларуссю і Еўрасаюзам, заявіў 3 верасня ў Мінску каардынатар федэральнага ўрада Германіі па міжграмадскім супрацоўніцтве з Расіяй, краінамі Цэнтральнай Азіі і Усходняга партнёрства Гернат Эрлер.
На сустрэчы з журналістамі ён, у прыватнасці, адзначыў, што нагодай для яго візіту ў Мінск паслужыла вызваленне 22 жніўня шасцярых палітзняволеных і «звязаныя з гэтым чаканні беларускага кіраўніцтва ў тым, што тычыцца рэакцыі на гэта Захаду».
«Праблема палітзняволеных шматгадовая, яна з'яўлялася перашкодай для нармалізацыі адносін паміж Еўрасаюзам і Беларуссю», — сказаў Эрлер.
Згодна з яго словамі, паводле даручэння ўрада Германіі на сустрэчы з міністрам замежных спраў Беларусі Уладзімірам Макеем 3 верасня ў Мінску Эрлер паведаміў, што гэты крок вітаецца і ацэньваецца станоўча.
«Гэты крок адкрывае магчымасці для таго, што ў міжнародным плане завуць перазагрузкай адносін, — заявіў ён. — Вядома, хацелася б, каб гэты першы крок меў працяг. У якасці вырашальнай падзеі мы маем на ўвазе выбары, якія з'яўляюцца лакмусавай паперкай для ацэнкі шансаў на перазагрузку».
Як адзначыў Эрлер, калі выбары пройдуць сумленна і наглядальная місія БДІПЧ АБСЕ будзе мець магчымасць бесперашкодна ажыццяўляць працу па назіранні за імі, то гэта «аўтаматычна адчыняе дзверы перад Еўрасаюзам і Германіяй для паляпшэння адносін».
Прадстаўнік Германіі падкрэсліў, што да 30 кастрычніка павінна быць прынятае рашэнне па пытанні аб санкцыях ЕС у дачыненні да Беларусі. «Калі ацэнка выбараў будзе станоўчай, будзе адкрыты шлях у кірунку прыпынення санкцый і пачатку палітычнага дыялогу па сутнасці, — сказаў нямецкі чыноўнік. — У межах гэтага дыялогу гатовыя прыйсці да супрацоўніцтва па шэрагу кірункаў, якія ўяўляюць цікавасць для Беларусі, у тым ліку па перамоўным працэсе аб аблягчэнні візавага рэжыму, магчымасці правядзення ў наступным годзе інвестыцыйнай канферэнцыі, аказанні падтрымкі Беларусі па ўваходжанні ў СГА».
Эрлер таксама адзначыў, што Макей заявіў пра гатоўнасць беларускага боку «на выбарах пайсці ў падтрымку чаканняў Захаду, у тым ліку ў тым, што тычыцца працы наглядальнай місіі, і такім чынам адкрыць магчымасць для развіцця адносін».
Паколькі ў наступным годзе Германія будзе старшынёй у АБСЕ, на сустрэчы з Макеем было закранутае і пытанне пра будучыню гэтай арганізацыі, паведаміў Эрлер. У прыватнасці прадстаўнік Германіі падкрэсліў неабходнасць адкрыць у Беларусі тэхнічны офіс АБСЕ, які будзе аказваць падтрымку па рэалізацыі сумесных праектаў. Паводле слоў Эрлера, Макей заявіў пра гатоўнасць Беларусі да пашырэння супрацоўніцтва з АБСЕ.
