У н.п. Чангар (Херсонская вобласць) на адміністрацыйнай мяжы з Крымам удзельнікі «Грамадзянскай блакады Крыма» перакрываюць дарогу і ўладкоўваюцца для правядзення працяглай акцыі.
Як паведамляе ў Facebook Валерыя Івашкіна, якая знаходзіцца на месцы падзеі, на Чангары сабралася каля сотні байцоў ДУК «Правы сектар».
Таксама ўстаноўлены вялізны вайсковы намёт, а ў адміністрацыйным будынку насупраць разгарнулі палявую кухню.
«ПС ўсталёўвае цяжкія бетонныя скрыні. … Спецыяльна пад актывістаў будуць маляваць зебру, каб забяспечыць бяспеку», — адзначыла яна.
Па словах Івашкінай, грузавікоў блізу Чангара цяпер няма, а ў ДАІ кіроўцаў папярэдзілі не ездзіць 20 верасня ў напрамку мяжы.
На месцы падзеі прысутнічае кіраўнік Меджліса Рафат Чубараў, крымскія татары, актывісты. Намеснік начальніка УУС Херсонскай вобласці Ілля Ківа таксама знаходзіцца на месцы правядзення акцыі.
8 верасня лідар крымскататарскага народа Мустафа Джэмілеў, Рафат Чубараў і віцэ-прэзідэнт Сусветнага кангрэса крымскіх татараў Ленур Іслямаў абвясцілі аб падрыхтоўцы акцыі «Грамадзянская блакада Крыма».
Яны прадставілі дакумент «Патрабаванні ўдзельнікаў грамадзянскай блакады Крыма да ўладаў РФ», у якім пералічаныя шэраг патрабаванняў да ўладаў РФ, сярод іх — вызваленне ўкраінскіх палітвязняў Надзеі Саўчанка, Алега Сянцова, Аляксандра Кольчанкі, Аляксандра Кастэнкі, Ахтэма Чыйгозы, Мустафы Дэгерменджы, Алі Асанава і Таіра Смяедляева, спыненне пераследу крымскіх татараў, свабодныя ўмовы працы для ўкраінскіх СМІ і замежных журналістаў, а таксама зняцце забароны на ўезд у Крым лідарам крымскататарскага народа.
16 верасня Чубараў абвясціў аб тым, што 20 верасня ў 12:00 для грузавікоў будуць перакрытыя ўсе тры дарогі, вядучыя з мацерыковай Украіны ў Крым. Ён таксама адзначыў, што рух людзей і легкавых аўтамабіляў будзе бесперашкодным.
Пазней Чубараў заявіў, што не выключае, што ўслед за «прадуктовай блакадай» анексаванага Крыма крымскія татары будуць дамагацца спыніць пастаўкі электраэнергіі на паўвостраў.
