 Марыуш Машкевіч |
Дзелавыя стасункі паміж Венесуэлай і Беларуссю не маюць нічога агульнага з адмываннем грошай, гаворыцца ў распаўсюджанай 11 сакавіка заяве пасольства Баліварыянскай Рэспублікі Венесуэла.
Заява зроблена ў сувязі з каментарыем былога пасла Польшчы ў Беларусі Марыюша Машкевіча наконт «Белнафтахіму», які ён даў nn.by. У прыватнасці, М. Машкевіч выказаў думку, што канцэрн хацелі выкарыстаць як «дапаможную структуру для адмывання грошай» пры продажы венесуэльскай нафты.
«Для былога польскага пасла прычынай для злараднасці паслужылі санкцыі ўрада Буша [які дыхае на ладан], прадпрынятыя ў дачыненні да суверэннай дзяржавы толькі за тое, што яна не хоча прыслугоўваць уладным людзям, якія дзейнічаюць шляхам агрэсій і санкцый, шляхам акопвання на чужых тэрыторыях для акальцоўвання Расіі, у запале страсці да яе прыродных багаццяў», — гаворыцца ў заяве пасольства Венесуэлы.
Выказванні М. Машкевіча, падкрэсліваецца ў заяве, з’яўляюцца «грубым і безадказным падманам».
«Не мае таксама нічога супольнага з рэчаіснасцю сцвярджэнне аб існаванні нібыта падпісаных пагадненняў аб «продажы венесуэльскай нафты». Такіх няма ў прыродзе», — гаворыцца ў дакуменце.
Пасольства «настойліва раіць» М. Машкевічу «добра папаласкасць рот, перш чым гаварыць аб годных прэзідэнтах».
