Аўстралійскія медыкі правялі найскладанейшую аперацыю па сумяшчэнні частак хрыбетніка пасля страшнай траўмы. Сюжэт пра гэта з'явіўся на аўстралійскім тэлеканале 7 News Melbourne.
7 News Melbourne / facebook.com
Маленькі аўстраліец Джэксан Тэйлар, якому няма яшчэ і паўтара года, атрымаў найцяжэйшыя траўмы з-за аўтамабільнай аварыі. Машына, у якой ехалі Джэксан і яго сям'я, трапіла ў лабавое сутыкненне на хуткасці 70 км/г.
Удар быў настолькі моцным, што Джэксан атрымаў траўму, якую называюць «ўнутранае абезгалоўліванне» — яго шыя аказалася зламаная, а чэрап аддзяліўся ад хрыбетнага слупа. Прычым галава «прасунулася» наперад — гэта найбольш цяжкі з магчымых пераломаў такога тыпу.
У большасці выпадкаў такая траўма прыводзіць да імгненнай смерці. Многія выжылыя пацыенты застаюцца паралізаванымі назаўжды, губляючы магчымасць нават дыхаць самастойна.
Аднак аўстралійскі хірург Джэф Аскін правёў найскладанейшую 6-гадзінную аперацыю, падчас якой сумясціў часткі хрыбетніка дзіцяці. Каб змацаваць іх, ён выкарыстоўваў малюсенькія «дроты» і элементы, зробленыя з рэбра хлопчыка.
Каб не дапусціць новага зрушэння, медыкі часова надзелі на яго галаву спецыяльны абруч — «гало». Металічны каркас фіксуе чэрап на месцы і гарантуе бяспеку хрыбетніка на час рэабілітацыі.
Цяпер Джэйсан ужо сам дыхае і рухаецца, можа хадзіць з падтрымкай дарослых. Праз два месяцы каркас можна будзе зняць, а хлопчык зможа быць такім жа жвавым, як любое дзіця.
