 Алесь Міхалевіч |
Суд па справе Міхалевіча працягнецца ў панядзелак а 9-й гадзіне. Сёньня адбылося першае паседжаньне, на якім прысутнічаў Алесь Міхалевіч і прадстаўніца «Советской Белоруссіі». Павал Якубовіч у суд не зьявіўся.
Наконт прадмету зыску прадстаўніца СБ выказалася ў тым сэнсе, што ў артыкуле выкарыстаны «вобраз, які адлюстроўвае ацэнку аўтарам магчымасьці зысца дапамагчы прадпрымальнікам у вырашэньні іх спэцыфічных праблем». Зыск адказчык не прызнаў.
У судзе прадстаўніца газэты запыталася ў сп. Міхалевіча, ці не зьяўляецца ён фігурантам справы з фальшывым накладам газэты «СБ» у сакавіку 2006 году. Міхалевіч заявіў, што гэта ня мае ніякага дачыньня да справы. На гэта палітык пачуў: «Значыць, маеце. Ці ня хочаце Вы такім чынам сябе рэабелетаваць». Міхалевіч адказаў, што не.
Агулам сёньняшняе паседжаньне заняло 35 хвілін. Чаму суд яшчэ ў пятніцу ня вынес рашэньне? Алесь Міхалевіч лічыць, што для рашэньня па ягонай справе суду патрэбныя кансультацыі.
11 студзеня 2008 году ў газэце «Советская Белоруссия» быў надрукаваны артыкул Арцёма Чалядзінскага «Крутой мираж». Сярод іншага аўтар артыкула сьцьвярджае: «Потому они искренне полагают, что никогда в жизни не вырастившие и тем более не продавшие ведра картошки Михалевич — Милинкевич реально помогут им в специфических предпринимательских проблемах».
Як было высьветлена на папярэднім разглядзе справы, пад гэтым псэўданімам друкуецца галоўны рэдактар «Советской Белоруссии» Павел Якубовіч.
Алесь Міхалевіч лічыць, што гэты артыкул ганьбіць ягоны гонар, годнасьць і дзелавую рэпутацыю. Ён патрабуе ад «Советской Белоруссии» абвергнуць на сваіх старонках непраўдзівыя зьвесткі пра яго, а таксама выплаціць кампэнсацыю маральнай шкоды ў памеры 6160 рублёў — столькі каштуе ў ГУМе новае вядро для бульбы.
