Чым бліжэй да выбараў, тым больш заклікаў наведаць выбарчы ўчастак і адпаведных улётак атрымліваюць патэнцыйныя выбаршчыкі.
Да своеасаблівага «флэшмобу» які літаральна з пачатку кастрычніка распачала «Советская Белоруссия», далучыліся і службы ЖКГ. Улёткі раскідваюць па паштовых скрынях, расклейваюць у пад’ездах. У іх выбаршчыкаў абяцаюць і накарміць і пабавіць — галоўнае, каб яны прыйшлі галасаваць.
Напрыклад, у адной з улётак кожнага сотага выбаршчыка абяцаюць узнагародзіць квітком на «культурнае мерапрыемства», іншыя могуць атрымаць дысконтную карту. А калі прыйсці ўсёй сям'ёй, то нават сфатаграфуюць бясплатна.
Іншая ўлётка абяцае не толькі прадукты па зніжаных цэнах, але і дапамогу з дастаўкай садавіны і гародніны. А што, раз на пяць гадоў, можна і мех бульбы пенсіянеру адвезці.
Ну і, як звычайна, тыя хто прыйдзе галасаваць упершыню ў жыцці атрымае сувенір ці падарунак.