Курэнне ў хуткім часе можа стаць прычынай заўчаснай смерці траціны маладых людзей у Кітаі. Да такой высновы прыйшлі навукоўцы з Оксфардскага універсітэта, Кітайскай акадэміі медыцынскіх навук і Кітайскага цэнтра па кантролі за захворваннямі.
AP
Вынікі даследавання, апублікаванага ў часопісе Lancet, сведчаць, што дзве траціны маладых мужчын у Кітаі пачынаюць курыць, не дасягнуўшы 20 гадоў. І ў палове выпадкаў курэнне стане прычынай заўчаснай смерці.
Даследаванні праводзіліся двойчы, з перапынкам у 15 гадоў, і ахапілі некалькі сотняў тысяч людзей.
Калі лік курцоў у Кітаі не будзе скарачацца, то смяротнасць, звязаная з курэннем, да 2030 года дасягне двух мільёнаў чалавек у год. Аўтары дакладу называюць гэта «эпідэміяй заўчаснай смяротнасці».
«Каб спыніць хвалю смерцяў, трэба кінуць [курыць]. А калі вы яшчэ маладыя, не пачынайце», — кажа навуковец Рычард Пэта з Оксфардскага універсітэта.
Паводле даследавання, за апошні час колькасць мужчын-курцоў у Кітаі значна павялічылася, і прапарцыйна гэтаму расце колькасць смерцяў ад захворванняў, выкліканых курэннем. У той жа час маладыя жанчыны ў краіне менш схільныя да курэння.
Улады Кітая ўжо выказваюць сваю занепакоенасць. З 1 чэрвеня гэтага года ў Пекіне ўступіла ў сілу забарона на курэнне ў грамадскіх месцах.
Новы закон забараняе курыць у рэстаранах, установах і грамадскім транспарце ў Пекіне. Тысячы інспектараў будуць сачыць за яго выкананнем. Парушальнікам пагражае штраф у 200 юаняў (32 даляра).
Аднак эфектыўнаму выкананню закона перашкаджае папулярнасць курэння сярод насельніцтва, а таксама той факт, што продаж цыгарэт прыносіць значныя прыбыткі дзяржаве.
Сусветная Арганізацыя Аховы здароўя заяўляе, што ў цэлым у свеце прыкладна палову курцоў чакае заўчасная смерць.