Караткевіч: Мы чакаем перамогі, чакаем двухзначнай лічбы і другога тура
Таццяна Караткевіч прагаласавала а 12-й гадзіне сама за сябе.
На ўчастак яна прыйшла разам з мужам. Караткевіч выйшла з кабінкі і паказала бюлетэнь журналістам. У ім насупраць яе прозвішча стаяла тлустая «птушачка». Затым яна сфатаграфавала бюлетэнь на мабільнік і паклала ў скрыню.
«Мы чакаем перамогі, чакаем двухзначнай лічбы і другога тура, — паведаміла Караткевіч на беларускай мове. – На плошчу я клікаць не буду, бо, па-першае, не ўпэўненая, што магу забяспечыць бяспеку людзям. А па-другое, верагодныя правакацыі ад іншых сіл».
Неверагодная яўка на датэрміновым галасаванні – гэта, па яе словах, «страх улады перад другім турам».
Пасля галасавання Таццяна паедзе да сына, які гуляе ў піянербол. Затым, па яе словах, будзе ў горадзе.
«Пра лічбу, якая атрымаецца, казаць не магу. Але за мірныя перамены прагаласуе шмат людзей», — запэўніла Караткевіч.
Каментары