Дырэктарку Бібліятэкі ўкраінскай літаратуры Наталлю Шарыну пасадзілі пад хатні арышт. У судзе яна заявіла, што не прызнае сваёй віны. Пад хатні арышт адправіць бібліятэкара прасіў СК РФ. Пракуратура выступала за меру стрымання, не звязаную з пазбаўленнем волі.
На Шарыну завялі справу па артыкуле 282 КК РФ («Узбуджэнне нацыянальнай нянавісці і варожасці, а роўна зневажэнне чалавечай годнасці»). Яе абвінавачваюць у распаўсюдзе кніг украінскага нацыяналіста Дзмітрыя Карчынскага, якія ў Расіі прызнаныя экстрэмісцкімі. Гэтыя кнігі следчыя знайшлі пры вобшуку ў бібліятэцы.
Ператрус прайшоў 28 кастрычніка. Наталлю Шарыну пасля гэтага затрымалі. 30 кастрычніка яе вазілі ў СК РФ для прад'яўлення абвінавачвання. Як распавёў адвакат дырэктаркі бібліятэкі, ёй давялося выклікаць «хуткую дапамогу» з-за высокага ціску.
Дзмітрый Карчынскі — лідар украінскай арганізацыі «Братэрства». Гэты рух прызнаны ў Расіі экстрэмісцкім, яго дзейнасць на тэрыторыі РФ забароненая. Карчынскі праходзіць па справе аб публічных закліках да тэрарызму і «развязвання агрэсіўнай вайны». Яго таксама падазраюць ва ўдзеле ў баявых дзеяннях на баку чачэнскіх сепаратыстаў супраць федэральных войскаў у 1990-х гадах.
