Беларуская эканоміка знаходзіцца ў рэцэсіі, у сярэднетэрміновай перспектыве чакаецца стагнацыя. Такі прагноз утрымліваецца ў макраэканамічным аглядзе Сусветнага банка, прэзентацыя якога адбылася 2 лістапада ў Мінску.»Эканоміка Беларусі знаходзіцца ў стане рэцэсіі: у сувязі са слабым унутраным і знешнім попытам рэальны выпуск скарачаецца — упершыню з 1995 года», — падкрэсліваецца ў макраэканамічным аглядзе.
Эканамісты Сусветнага банка канстатуюць, што са студзеня па верасень 2015 года ВУП Беларусі ў рэальным выражэнні знізіўся на 3,7% да аналагічнага перыяду папярэдняга года (хаця за такі ж перыяд 2014 года ВУП вырас на 1,6%).
«Эканамічны спад у Расіі аказаў негатыўны ўплыў на прамысловасць, дзе аб'ём вытворчасці ўпаў на 7,1% у рэальным выражэнні. У сельскай гаспадарцы спад вытворчасці склаў 3,1%. Рэцэсія і захаванне інфляцыі абумовілі падзенне рэальных зарплат і даходаў насельніцтва, і, адпаведна, скарачэнне ўзроўню спажывання дамашніх гаспадарак», — зазначаюць эксперты Сусветнага банка.
Сёлета, працягваюць яны, у Беларусі назіралася таксама скарачэнне інвестыцый у асноўны капітал. Паводле ацэнак Сусветнага банка, у 2015 годзе ВУП Беларусі знізіцца на 3,5%, у 2016 годзе — на 0,5%.
«Структурныя дысбалансы, якія назіраюцца з 2008 года, узмацняюцца зніжэннем попыту на рынках Расіі і Украіны, а таксама падзеннем цэн на сыравіну, што абумоўлівае глыбіню чаканага спаду. Аднаўленне ўнутранага попыту выглядае малаверагодным», — лічаць эканамісты банка.
На іх думку, кароткатэрміновае стымуляванне ўнутранага попыту за кошт квазіфіскальных мер і павышэння зарплат практычна немагчымае ва ўмовах значных выплат дзяржавы па знешніх абавязацельствах.
«У названых абставінах стагнацыя эканомікі ўяўляецца найбольш верагодным сцэнарыем. З прычыны магчымых ваганняў абменнага курсу і запланаванага росту тарыфаў на жыллёва-камунальныя паслугі ўзровень інфляцыі па-ранейшаму будзе вымярацца двухзначнымі лічбамі», — прагназуюць эканамісты Сусветнага банка.
Паводле ацэнак экспертаў, у выпадку правядзення ўзважанай макраэканамічнай палітыкі і рэалізацыі структурных рэформ (пры некаторай фінансавай падтрымцы звонку), «перспектывы аднаўлення эканамічнага росту ў 2017 годзе выглядаюць больш спрыяльнымі, нягледзячы на працяг спаду ў 2016 годзе».
У 2017 годзе ў Беларусі можа адбыцца нязначны рост ВУП і скласці каля 1%, прагназуюць эканамісты Сусветнага банка.
