Міністр спорту Расіі Віталь Мутко ў адказ на гучныя абвінавачванні камісіі Сусветнага антыдопінгавага агенцтва, заявіў што расійская дзяржава можа спыніць фінансаванне антыдопінгавых праграм у краіне.
«Калі трэба ўсю гэтую сістэму закрыць, то мы з задавальненнем закрыем. Спынім плаціць унёскі, спынім фінансаваць Расійскае антыдопінгавае агенцтва, Маскоўскую антыдопінгавую лабараторыю. Толькі зэканомім грошы. Але што б мы ні рабілі — усё дрэнна», — цытуе Мутко Інтэрфакс.
Міністр спорту заявіў інтэрв'ю агенцтву, што ў Расіі былі і ёсць праблемы з допінгам, але яна іх ніколі не замоўчвала.
Камісія Сусветнага антыдопінгавага агенцтва (WADA) у панядзелак апублікавала вялікі даклад, у якім рэкамендавала Міжнароднай асацыяцыі лёгкаатлетычных федэрацый дыскваліфікаваць Усерасійскую федэрацыю лёгкай атлетыкі за сістэматычныя парушэнні, звязаныя з ужываннем допінгу спартоўцамі.
Пры гэтым кіраўнік камісіі Рычард Паўнд абвінаваціў у датычнасьці да ўтойвання выпадкаў ужывання допінгу ФСБ і асабіста Віталя Мутко.
У дакладзе, у прыватнасці, гаворыцца, што маскоўская антыдопінгавая лабараторыя пад кіраўніцтвам Рыгора Родчанкава знішчыла 1417 допінг-пробаў перад прыездам інспекцыі WADA.
Віталь Мутко заявіў Інтэрфаксу, што пробы былі знішчаныя з ведама самога ж WADA, аднак з далейшых яго тлумачэнняў вынікае, што агенцтва не давала указанняў знішчыць пробы.
«Гэта рабілася з ведама WADA, якое спусціла цыркуляр. Там ёсць працэдура, спусцілі: «З такога-та моманту пробы захавайце». Па астатніх не было указанняў, і яны былі знішчаныя», — патлумачыў Мутко.
Рыгор Родчанкаў у гутарцы з Бі-бі-сі не адкінуў наўпрост абвінавачванні камісіі WADA, а паабяцаў адказаць на іх пазней.
«Гэта толькі меркаванне незалежнай камісіі. Я дам поўную справаздачу. Усе гэтыя абвінавачванні былі мне вядомыя і раней, і я дам на іх разгорнуты адказ», — сказаў Родчанкаў, дадаўшы, што ён дзейнічаў «у поўнай адпаведнасці з міжнароднымі стандартамі працы (антыдопінгавых ) лабараторый».
