Рада Міжнароднай асацыяцыі лёгкаатлетычных федэрацый (ІААФ) прыняла рашэнне аб часовым адхіленні Расіі ад спаборніцтваў пад сваёй эгідай на нявызначаны перыяд.
Пра рашэнне абвясціў кіраўнік ІААФ Себасціян Коў
За адхіленне Расіі прагаласавалі 22 члены камітэта з 24. Адзін прагаласаваў супраць. Расія, якая ўваходзіць у раду, не мела права голасу.
Рашэнне ўступае ў сілу неадкладна. Гэта робіць немагчымым удзел зборнай Расіі па лёгкай атлетыцы ў Алімпійскіх гульнях у Рыа-дэ-Жанейра.
Камісія Міжнароднага антыдопінгавага агенцтва раней рэкамендавала прыпыніць дзейнасць Усерасійскай федэрацыі лёгкай атлетыкі (ВФЛА) за сістэматычныя парушэнні, звязаныя з ужываннем допінгу спартоўцамі.
У незалежнай справаздачы антыдопінгавага агенцтва гучалі абвінавачванні ў адрас ВФЛА, Расійскага антыдопінгавага агенцтва (РУСАДА) і трэнераў па лёгкай атлетыцы ў выкарыстанні забароненых прэпаратаў для падрыхтоўкі спартсменаў да спаборніцтваў.
