Расійскі прэзідэнт Уладзімір Пуцін на прэс-канферэнцыі пасля завяршэння саміту «Вялікай дваццаткі» ў турэцкай Антальі абвінаваціў некаторыя краіны G20 ў заключэнні нафтавых здзелак з экстрэмісцкай арганізацыяй «Ісламская дзяржава».
Кажучы пра крыніцы фінансавання джыхадзістаў, Пуцін распавёў пра здымкі з космасу, на якіх, па яго словах, «ясна відаць, якія маштабы набывае незаконны гандаль нафтай і нафтапрадуктамі». Як сказаў Пуцін, на здымках відаць калоны аўтамашын-запраўшчыкаў, якія расцягнуліся на дзесяткі кіламетраў.
«З вышыні 4-5 тысяч метраў яны сыходзяць за гарызонт. Выглядае гэта як нафтаправодныя сістэмы», — растлумачыў расійскі прэзідэнт, дадаўшы, што абмеркаваў гэтае пытанне з калегамі з іншых краін.
У Крамлі перакананыя, што «Ісламская дзяржава» такім чынам атрымлівае фінансаванне ад 40 краін свету, і ў гэтым спісе ёсць краіны, якія ўваходзяць у G20, заўважыў Пуцін.
Пры гэтым Пуцін прызнаўся, што разлічвае на працяг сумеснай працы з лідарамі краін G20, якая «надзвычай важная для барацьбы з тэрарызмам». Адной з магчымых мер Пуцін лічыць стварэнне міжнароднай антытэрарыстычнай кааліцыі.
«ЗША першапачаткова адмовіліся супрацоўнічаць у барацьбе з ІД, але цяпер прыходзіць усведамленне неабходнасці сумесных дзеянняў», — дадаў Пуцін.