Суд Цэнтральнага раёна Мінска 20 лістапада аштрафаваў апазіцыйных палітыкаў Анатоля Лябедзьку і Вячаслава Сіўчыка на 50 і 60 базавых велічынь (9 і 10,8 млн рублёў) адпаведна.
Лябедзька прызнаны вінаватым на падставе ч. 3 арт. 23.34 КоАП (парушэнне парадку арганізацыі ці правядзення масавых мерапрыемстваў паўторна на працягу года) за ўдзел у акцыі памяці ахвяр сталінскіх рэпрэсій, якая прайшла каля будынка КДБ у Мінску 29 кастрычніка.
«Суддзя Вікторыя Шабуня, якая судзіць мяне ўжо трэці раз на працягу месяца, звычайна, выносячы прыгаворы, кажа, што яны заснаваныя на пісьмовых матэрыялах справы і паказаннях сведак. Цяпер яна нават гэтага не сказала. Сведкі блыталіся ў паказаннях. Міліцыянер, які складаў пратакол, так і не змог даказаць, што ж супрацьзаконнага я рабіў», — сказаў Лябедзька.
Паводле яго слоў, суды над апазіцыйнымі актывістамі ў Беларусі «пастаўленыя на канвеер». «Ніякай лібералізацыі няма. Гэта гаворыць аб тым, што нам трэба складаць свой беларускі спіс чыноўнікаў і суддзяў, вінаватых у парушэнні закона і правоў чалавека. Калі брусельскі спіс цяпер знаходзіцца ў замарожаным стане, то нам самім трэба праводзіць маніторынг таго, што адбываецца ў краіне», — адзначыў Лябедзька.
Сіўчык прызнаны вінаватым на падставе арт. 23.34. КоАП (парушэнне парадку правядзення масавага мерапрыемства) за ўдзел у акцыях апазіцыі 23 верасня і 4 кастрычніка і арт. 17.1 (дробнае хуліганства). «Зразумела, што гэта палітычнае рашэнне. Гэта пацвярджае і тое, што суддзя падчас пасяджэння назвала мяне апазіцыйным палітыкам», — паведаміў ён.
