У Палацы мастацтваў у Менску адкрылася выстава «Пагоня», прысьвечаная 25-годзьдзю мастацкай суполкі «Пагоня».
24 лістапада днём, калі экспазыцыя была цалкам гатовая, карціны разьвешаныя, патэлефанавалі зь Міністэрства культуры і загадалі зьняць дзьве працы Аляксея Марачкіна. Гэта «Двубой, альбо супраціў дзьвюхгаловаму мутанту» і «Маці Божая Нябеснай сотні».
«Двубой, альбо супраціў дзьвюхгаловаму мутанту»
Спадар Марачкін апавёў карэспандэнту Свабоды, што карціну «Маці Божая Нябеснай сотні» ўдалося адстаяць. Мастак спаслаўся на афіцыйную пазыцыю Беларусі ў дачыненьні да Ўкраіны. А вось «Двубой» давялося зьняць, бо тады пад пагрозай была сама выстава.
Аляксей Марачкін — адзін з заснавальнікаў «Пагоні» і неадменны арганізатар выстаў творчай суполкі.
Таксама з выставы зьнялі карціну Алеся Пушкіна «Памяці беларусаў, загінулых за Украіну».
